Veivakatorocaketaki ena yasana o Serua

E vakaraitaka mai na Roko Tui Serua o Semi Kuru ni rua na veivakatorocaketaki levu e vakayacori tiko ena yasana o Serua.

Na kena imatai na kena vakalivalivataki na koro o Nabukelevu; e dua vei ira na ciwa na koro ena tikina o Serua. Ko iratou na walu tale na koro e wili kina o Serua ka tiko kina na nodra itikotiko na turaga na Vunivalu, Navutulevu, Naboutini, Namaqumaqua, Vunaniu, Korovisilou, Yanuca kei Culanuku.

Sa mai oti ka sega ni dua nai lavo era sauma na lewenivanua me vaka ni lako mai na veivuke ena porokaramu ni veivakalivalivataki ena taudaku ni koro lelevu (Rural Electrification).

E tukuna o Kuru ni sa waqa tu qo na livaliva ka sa qai vo ga me dolavi vakamatanitu.

Ko ira mai Navutulevu e tukuna o Kuru ni ra marautaka na nodra sa vakalivaliva, vakabibi ni sa na vukei ira na luvedra ena nodra vuli lesoni ena bogi ka vaka kina na nodra vakayagataka na vei yaya e gadrevi kina na livaliva me vaka na vatu ni yayani, misini ni savasava, sara iyaloyalo ena raitio-yaloyalo kei na so tale.

Nai karua ni veivakatorocaketaki, sai koya na kena caka tiko na gaunisala mai Nuku ka vakatokai tiko na Beqa Road.

E dua tale na veivakatorocaketaki levu ka na tara na yasana; na kena na tokitaki na wavu levu e Suva.

Sa ciqoma na valenivolavola ni yasana nai vakaro me na tiko ena bose me baleta na wavu na turaga Roko.

Na caka ni wavu oqo ena tara yani na nodra iqoliqoli mai Namosi, Korolevu e Serua kei Rewa.