‘Vinaka Vakalevu na Veivakabauti’
Evakavinavinakataka na turaga na peresitedi ni soqosoqo vakapolitiki na SODELPA o Ratu Epenisa Cakobau o qasenivuli vakacegu Peni Sokia, ena nodra veivakabauti ena nodra kerei koya me sa mata digitaki ni soqosoqo ena veidigidigi ena yabaki oqo.
Ko Sokia e tukuna mai kina Siga Rarama ni o koya ena matataka na ceva kei Tailevu ka oqo talega na vanua ena vunau kina.
Sa kilai tiko ni o Ratu Rabici Seniloli ka lewena tiko na palimedi ena gauna oqo, e tukuna o Sokia, e sa na sega ni na tu ka sa mai kerei kina o koya me sa na tu.
E tukuna ni sa tu vakarau tu ka kila vinaka tiko ni dua e digitaki me laki lewena na palimedi ena dua nai tavi levu ena qarava.
Sa matau ena qaravi tavi o Sokia me vaka ni a qasenivuli tu mai na yabaki 1981 – 1995.
Ena 1996 e curu kina Tabacakacaka iTaukei ka laki tara sara nai tutu vaka Vukevuke ni Roko.
E a qarava tale tu ga na Tabana ni Tukutuku ni Tabacakacaka iTaukei.
E a tosoi cake na nona itutu me sa Roko Tui ka qaravi Lau.
Ni oti oya e a lesi sara me laki Roko Tui Naitasiri.
Ena yabaki 2014 sa vakacegu ka laki tu ena nona koro o Namata ena tikina talega o Namata.
E tukuna o Sokia ni levu sara na itavi e laki vakaitavitaki kina ena koro ena tabana ni veivakatorocaketaki.
Ko Sokia e lewena na Bose ni Yasana o Tailevu mai na yabaki 2014 me yacova tiko mai o qo ia sa na vakarau kerea na nona vakacegu ni sa mai vakataivi ena politiki.
Sa yabaki 67 ena gauna qo o Sokia ka sa dauvunau ena Lotu Wesele ka taura tiko nai tutu vaka Tuirara Levu ena tikina o Namalata ka wili talega kina na koro o Raralevu na nodra itikotiko na Turaga na Roko Tui Namata.