Veivuke kina Yasana o ira na Marama ni Naitasiri
Era tausoli na marama ni 16 na tikina o Naitasiri ka ra lako mai na 90 na kena veikoro e Vunidawa enai ka vitu ni Jiune me baleta tiko e rua na nodra ituvatuva me vukei kina na yasana.
Na turaga na Vunivalu Waima o Ratu Timoci Rokobukete na nodra vulagi dokai, e tukuna mai kina Siga Rarama ni ra wili talega ena tausoli ko ira na marama ni yasana o Naitasiri era sa vakaitikotiko mai Mereke.
Ko ira na marama mai Mereke era a sa vakauta mada eso nai yaya ni Vale ni Volavola ni Yasana ka ra kerei talega mera mai veivuke ena nodra tausoli soli na marama.
E nodra veivuke mai kina tausoli oqo e $50,000.
Na soli ena e tiko talega kina o Lenora Qereqeretabua ka tukuna na turaga na Vunivalu Waima ni o koya e vasu ki Nabaitavo.
Ni wiliki na soli kei na veivuke mai Mereke e rawa kina e voleka ni $70,000.
E qoroya na Vunivalu Waima na nodra igu na marama vakabibi ena gauna leqaleqa eda curuma tiko ena gauna oqo.
Ena gauna sa caka kina na kana era sa dui kania ga na kedra ena nodra vakabibitaka tiko na nodra veibatiki.
Na imatai ni nodra sasaga na marama sai koya me
dua na vale ni vakacegu me tara ga ena qele lisi ni yasana.
E tukuna o Ratu Rokobukete ni vale oqo mera mai vakacegu kina ko ira na bukete se ko ira na marama era mai laurai ena valenibula e Vunidawa.
Nai karua ni nodra sasaga me dua na vale ni wawa kei na dua na vale ni kana, me tara volekata ga na valenibula
Ena gauna oqo e sega na vale ni wawa mera mai tiko kina na marama ena yasana o Naitasiri era wawa vakasucu.
Ni sa rawa oqo e sa na veivuke vakalevu sara vei ira na marama ena loma ni yasana.
Ko ira na lewe ni koro o Nakorovatu e tukuna na Vunivalu Waima ni ra vakarautaka na kedra kakana na marama.
Vakavakarau kina veidigidigi
Ena nodra vakarautaka na veidigidigi, e tukuna o Ratu Rokobukete ka iliuliu talega ni Bose Vanua, ni ra vakadonuya na turaga iyavusa mera lako yani nai soqosqo vakapolitiki mera laki vunau. Ia era sa kerei vakabibi mera vunautaka na ka e dina ka kakua ni ra laki tukuna eso na ka me rawa kina ni ra rawata na digidigi mai na koro tikina se yasana.
Ko ira na dodonu mera veidigidigi e tukuna ni ra sa cula kece ka sa tiko talega na nodra tiki ni pepa ni veidigidigi ka rawa mera na vakayagataka.
Vei ira era sa veidigidigi oti, era sa veisautaka na nodra tiki ni pepa ni veidigidigi.