Nataleira, Tailevu

E saga na koro o Nataleira, Dawasamu, Tailevu me rawata na ituvatuva ena yabaki 2022.

Tukuna na turaganikoro o Mesake Ravulo ni matai sai koya na kena qaravi na valenikuro ni nodra valenisoqo. Na cakacaka oqo ena vinakati me na sema na valenikuro kina valenisoqo me vakarawarawataka na vakasaqa ena dua na soqo. Oqo ena vakarawarawataka na kena vakarau na kakana kei na taqei ni kakana vakabibi ena gauna ni draki suasua.

E dua tale na kena caka na gaunisala ena loma ni koro, mena vakarawarawataka na kena talaci na iyaya lelevu e voli mai kina vuvale.

Ena gauna oqo e tukuna o Ravulo ni yaya lelevu sa tala ga e bati ni gaunisala levu kara qai colati kina veivale. Na gaunisala kina loma ni koro ena vakarawarawataka na kena kauta yani nai yaya lelevu kina veivuvale na lori.

Sa levu na tara vale e Nataleira ka sa toso na koro. E levu na veivale oqo e sega ni yacov ira na livaliva ia e sa na caka mera vakalivaliva kece.

E dua na sala-ni-wai simede (culvert) e tiko ena koro, ka dau talabusese kina wai ena gauna e dua kina na uca bi. Ni sa talabusese na wai era laki luvu kina e rauta ni 20 na vale. Oqo e sa yaco makawa tiko mai ka sa kerei na tabana ni `Waterways’ me ratou laki raica.

Eratou sa yaco ka laki dikevi na sala ni wai ia e sega ni dua na ka e caka.

Nai otioti ni nodra ituvatuva me caka na gaunisala kina nodra iteitei (Farm Road). Sa lako na kerekere kina matanitu ia e sega ni sa dua na kena macala. Na gaunisala kina iteitei ea vakarawarawataka na kena kau mai na nodra ivoli kina koro me yaco sara kina makete.

Na koro o Nataleira e dua vei ira na ciwa (9) na koro ena tikina o Dawasamu.

Ko ira na koro oqo e wili kina o Driti ka tiko kina na nodra itikotiko na Turaga na Ratu e Dawasamu, Delakado, Luvunavuaka, Nataleira, Silana, Nasinu, Nabualau, Delasui kei Natadrave.

E tiko talega e Nataleira na nodra bure na saravanua ka vakatokai na Natalei Echo Lodge kara dau rawa ilavo na lewenivanua ena nodra dau laki veivakamarautaki kina.

>MAIKA BOLATIKI