Tatadra nai Tabagone ena Veivakatoroicaketaki
Na vakasama ni toso ki liu, cakacakavata kei na bula ni solesolevaki e dua nai vakarau eda dau kila tani kina na kawa iTaukei.
E dina ni sa tarai keda tiko mai na veisau ni gauna, ia ena sega ni rawa ni dodonu me da guilecava na veika eda tuberi ka vakavulici mai kina.
Ia, mai na koro ko Draubuta ena colo kei Navosa, era sa cakacakavata tiko na iTabagone (Draubuta CMF Youth) ena tatadra ni kena kau vakavoleka kivei ira na veivakatoroicaketaki.
Esa rua na yabaki na kena cici tu mai na itabagone oqo, ka sa qai mai vakadeitaki vakamatanitu ena yabaki oqo.
Era lewe 30 taucoko nai wiliwili ni tabagone era lewena tiko na soqosoqo e Draubuta, ka ra wili tale tiko ga kina na gonevuli.
Tukuna na nodra mata ko Viliame Gaso, ni ra tuvatuvakataka tiko ena kena kau vakavoleka yani vei ira na mona livaliva ‘WiFi’ me veivuke ena veitaratara ena vanua dredre era tiko kina.
Oqo e kaya ena veivuke kina na Telecom Fiji Limited, me vaka ni ratou sa veitalanoa oti tiko.
Nai karua ni nodra ituvatuva e kaya ko Gaso e baleta na vakatubu ilavo na itabagone ena Fijian Holding Unit Trust, ka sa dola
rawa kina e dua na nodra akaude ena vica na vula sa oti.
“Na tatadra e tiko sa ikoya o ira na tabagone era muri mai mera kua ni cumuwaqara na vaqara ilavo, koya na vuna keimami sa cakacaka vakaukauwa tiko kina ena vakatubu ilavo.”
Nai katolu sai koya na nodra sasaga tiko kina Minisitiri ni Tabagone kei na Qito me vukei ira ena veivuke ni yaya ni teitei, me vaka ni ra sa dau cakacaka ena veimacawa nai tabagone.
Na RED+ Fiji e tukuna ko Gaso ni sa lai yalataka me na vukei ira na itabagone ena susu oni ena koro ko Draubuta.
QITO
Ena vica na macawa sa oti me yacova mai na macawa oqo, era vaqara ilavo tiko nai tabagone me veivuke ena nodra qito kei na curucuru.
“Keimami sa mai vica na siga tiko qo ena veikau ena werewere ni vaqara ilavo. E vica vata na were keimami sa taleva oti mai, ka keimami sa rawata kina e $1,000 vakacaca. E levu na ilavo keimami sa rawata. E levu na ilavo keimami rawata esa vakacurumi ga ena FHL baleta ni dau tubu vaka tolu ena dua na yabaki.”
E levu sara na vanua e kaya o Gaso era sa dau lai qito mai kina.
“Keitou sega ni vosa walega, ia keimami matanataka na veika keimam=i tukuna. Ia, keimami tiko ga ena yavu sai koya na; lotu, veivakatoroicaketaki kei na qito.”
Tomana ko Gaso ni totoka na nodra duavata ka cakacakavata na nodra itabagone.
E levu na dredre e lako curumi ia e sega ni vakataotaka na nodra toso.
Feedback: ray@fijisun.com.fj