NA KEDA KAKANA DINA
Na kakana dina vakaviti sa kilai tu nikua me vuaniqele. Oqo na kakana era se vakayagataka mai liu o ira na noda qase era bulabula vinaka ka bula balavu kina. Na keda kakana e wili kina na uvi, dalo, tavioka kei na so tale. Ena so na vanua e dau tu eso na kakana dina ena noda vei itikotiko me keda icavuti ena so na gauna. Eso e kedra icavuti na kakana draudrau me vaka na “lewa ota”. Oqo e vakaraitaka na noda veiwekani tu kei ira na veika bula era tu wavoliti keda. Ena noda itikotiko vakavanua e dau vakayagataki na kakana dina me icabo ni magiti ena gauna ni soqo se solevu.
E wai, era dau lai qoli ena vaqara ika o ira na noda qase mei coi ni kedra. Era kania ka bula balavu o ira noda qase ena veika ga e tu wavoliti ira ena nodra veitikotiko.
Nikua eda sa vakayagataka na kakana rawarawa. Oqo me vaka na kakana qaqi ka voli mai na sitoa me vaka na kakana tawani tini. Eda rawa ni vakadinadinataka tu na gauna nikua ni sa vavuna e levu sara na vei mate ka levu na itabagone era sa mate dole tiko ena vuku ni kakana era dau kania.
Ena so na gauna ni da dau vinakata na kakana ni vaka loma vinaka eda sa cici tiko na sitoa, mai na noda sega ni vakayagataka na keda kakana dina, me vaka na qalu se vakalolo kei na vudi vakasoso.
Levu era teivaka na kakana dina me baleta na bula ni nodra matavuvale, ka so era vakaduri bisinisi se volitaka ena makete.
Na kakana vaka Viti talega e dodonu me dau sevu tiko ena veiyabaki kina vanua, ka so edau sevu kina lotu. Ni vakayacori tiko nai valavala vakavanua oqo eda na raica ni vuavuai vinaka na veika eda teivaka.
Nikua eda rawa ni vakadinadinataka ni levu na veika era dau vakayacora o ira na noda qase e liu eda sa sega ni vakamuri tiko nikua, ka na rawa ni muria mai na yali ni noda itovo kei na valavala vakavanua.