Dolavi na Valenisoro Oti e 34 na Yabaki

Edua na gauna talei ka na tukuni tu ni veigauna ena koro o Namuamua ena yasana ko Namosi na kena marautaki na dolavi ni nodra valenisoro vou ena i matai ni siga ni vula ko Me, 2024.

Na valesoro oqo a vakatabuya nai liuliu ni lotu Ekelesia Katolika e Viti kei Rotuma na Arepikapo Peter Loy Chong. A vakatokayacataki na valenisoro oqo vei Santo Iosefo na Daucakacaka (St Joseph the Worker), ka ra dau vakananuma na lotu Ekelesia e vuravura na nona siga ena matai ni Me. Na valenisoro na Santo Iosefo na Daucakacaka e vakarurugi ena parisi ko Santo Petero mai Namosi.

E rauta ni 34 na yabaki na nodra vosota ka yalodei tu mai na lewe ni lotu mai Namuamua me vakavotukanataki na nodra sasaga. E vakamacalataka ko Setefano Senimoli e dua na lewe ni komiti vakacegu, ni sega ni lakolako rawarawa vei ira ni ra vakasamataka lesu na dredre era sota kaya voli mai, me yacova na siga era sa mai vakadinadinataka kina na dolavi ni nodra valenisoro.

E kaya e levu sara vei ira era a tekivuna na tauyavu ni valenisoro era sa yali yani, ka diva me ra se bula tiko me ra vakadinadinataka talega na vanua era sa mai yacova.

“Oqo e dua na siga ena guiguilecavi dredre vei keimami.“

Ena loma ni 34 na yabaki oya, e kaya o Senimoli ni levu sara na lewe ni lotu Katolika era sa lai curuma tale eso na mata lotu ena loma ni koro.

“E levu sara na dredre keimami sota kaya voli mai, ia o ya era saluwaki tu ni veika vinaka kece e da dau sasagataka.”

E dina ni sega ni dua na veivuke vakailavo e lako mai tautuba me vukei ira, ia era sega ni tu vakasuka.

“E ra gole na turaga ki Tavua me ra lai musu dovu, ka so era gole i Lautoka ena samaki paini. Nai lavo kece era rawata mai e vakagolei kece na kena voli nai yaya ni valesoro.”

E tuturu na wainimadra na tiko rawa ena soqo ni dolavi ni valesoro oqo ena nodra vakasamataka lesu na tagi, oca kei na veidredre kece era lako curuma mai. Ia, era sa mai vakadinadinataka tu nikua na vua ni nodra vosota. Me yacova mai nikua e lewe lima na vuvale Katolika era se taura dei tiko na vakabauta mai Namuamua.

E taura e lima na vula na nodra vakarautaka na dolavi ni valesoro ka’ra veivuke talega kina na veimatalotu era tiko ena loma ni koro; ka wili kina na Lotu Wesele, ka oqo e vakaraitaki ni duavata.

Na valenisoro na Santo Iosefo na Daucakacaka (St Joseph the Worker) ka dolavi mai ena koro ko Namuamua mai Namosi ena i matai ni siga ni vula ko Me, 2024. E taura ni 34 na yabaki na kena cakacakataki mai na valenisoro oqo, ka sa mai vakavotukana na nodra sasaga na lewe ni lotu.

Nai liuliu ni Lotu Ekelesia Katolika e Viti kei Rotuma Arepikapo Peter Loy Chong, ko ira nai turaga Bete kei na Talatala Lotu Wesele ka vaka kina o ira lewe ni lotu mai Namuamua ka’ra tiko rawa me ra vakadinadinataka na kena sa mai dolavi na nodra valenisoro vou ena i matai ni siga ni vula ko Me, 2024.

Setefano Senimoli.