Pysy jäljen päälä!
Enontekiön poliisi antoi päässiisten aikhaan 20 sakkoo muturiskuutterin ajajiile jokka olthiin ajanheet ilman luvatta.
Monet ajajat olthiin yllättynheet. Monet ruijalaiset luulhaan ette skuutterilla saa Suomessa aijjaat joka paikassa. Päässiisten aikhaan iTromsö-aviisi kirjoitti tromssalaisesta perheestä joka oli äskön ostanu hyttän Kilpisjärveltä «ko täälä sie saat aijaat skuutterila missä sie halluut».
Mutta se ei ole tosi: Suomessa oon lupa ajela tyhä merkityilä skuutterijäljiilä.
– Se oon jokhaisen oma velvolisuus ottaat selvän laista ja säänöistä ja missä oon lupa aijaat, erämaapoliisi Mika Seurujärvi sannoo.
Skuutterijäljet oon merkitty maasthoon ja karttoihiin.
– Se ette joku oon ajanu hangela ei meinaa ette se oon luvalinen aijaat pörässä, Seurujärvi sannoo.
«Reittiä» ja «uria»
Suomessa oon kahenlaissii skuutterijälkii. Viraliset moottorikelkkareitit oon melkkein ko maantiet ja sielä jällaa sama laki ko maantielä. Kuljettaajala häyttyy olla ainaki T-(traktori) lappu eli ajokortti. Sielä ei tarvitte muuta luppaa.
Suomessa oon kans moottorikelkkaurat. Sielä jällaa maastotrafiikkilaki. Jos sie halluut aijaat muturikelkkaurala, sie tarvittet ostaat «uraluvan» siltä kuka tämän jäljen oon tehny: Se saattaa olla Metsähallitus, kommuuni eli joku lukaali yhistys.
Kilpisjärven Ladut ry hoitaa Kilpisjärvelä hihtojälkii ja skuutterijälkii. Heän «uraluvan» sie saatat ostaat netistä.
Metsähallituksen «uraluvan» sie saatat ostaat netistä eli Kilpisjärven luontotalosta.
Suojele luontoo
– Kaikkiin reekeliitten tavustalla oon tietenki luonon ja luononelinkeinoitten suojeleminen. Se ei ole lupa livattaat pois skuutterijäljeltä. Kilpisjärvelä oon erityissii luononsuojelureservaattii niin ko Mallan ala ja Saanan eteläluokka missä ei ole ollenkhaan lupa aijaat skuutterila, Seurujärvi muistuttaa.
Ette skuutterit pysythään jäljen päälä oon tietenki tärkkee kans poroile ja poroelinkeinole.
Järven jäälä oon lupa aijaat skuutterilla - jos sinne vie luvalinen skuutterijälki. – Mutta ko sie ajat jäätä pitkin kolmenpyykile (Kolmen valtakunnan rajapyykile) ja halluut käyä Kuohkimajärven tuvala sie häyt parkkeerata skuutterin jääle ja kävelä tuvale.Tupa oon näjes suojelualala, kunterineuvooja Tiia Lepistö Kilpisjärven luontokeskuksesta muistelee.