Pölättelystä pelkkhään pölkhöön
Se oon raskas pittäät ylhäälä illoo, merkitystä ja motivasuunii ko taas tullee muistutetuksi siitä ette atomiasheet uhathaan kväänikansan, saamen kansan, koko Norjan kansan, mailman kaikkiin kanssoin koko olemassaolloo.
Ko mie olin nuori, mie muistan ette silloin minun äiti oli kiivas kaikenlaisten semmoisten asheitten vastustaaja, hän ja monet muut piđethiin globaalista tuhhoo niin isona uhkana ette kaikki muut assiit tulthiin vasta sen pörässä. Sen mielestä mailmala ei ollu atomiasheitten kansa minkhäänlaista tulleevaisuutta, ja mie tulin veđetyksi myötä hänen työhön rauhan puolesta ja atomiasheita vasthaan. Hiljemin kauhistus lymys, ja pää penshaassa itte kukanenki oon hommailu kuka mitäkin. Kiini tähän asti ko kauhistus taas oon itäny framile ja näyttäny ittensä epähumaanisen kuunaaman.
Atomiasheet oon maanpäälinen antikristus. Atomiasheet oon materialiseeraantunnutta pahhuutta; net anttaavat luvan ette ilman rankaisematta saapi iskeet kuolihaaksi.
Tääpänä se on Putin, mutta semmoissii superkonnii löyttyy kolmetoista tusinasta. Meilä oon niitä kokonainen raito ođottamassa tulleevassa aijassa. Meiđän erinomhainen, korkkeesti kunnioitettu demokrattiiki oon niin ko vasiten tehty lykkäämhään framile mätämunnii. Systemaattisesti jakamhaan valttaa ihmisille joita ei mishään taphauksessa pitäis päästäät hallittemhaan. Vallanhimoisille, misthään perustamattomille konnile jokka pöläthään tyhä yhtä assiita: ajatusta ette het häyđyttäis päästäät irti vallasta.
Sen tähđen, ko met tieđämä ette demokrattiiki saattaa vajota tyraniisseen, saattaa ihmiskunnan tulleevaisuuđen turvata parhaimitten sillä ette ei olheen anneta semmoista asetmahtii ittevaltaisten ihmisten halthuun.
Mutta ei pieni, rauhaa rakastaava Norjakhaan ole pitäny viishaana kokonhansa ja ijänkaikkisesti kielttäyttyyt atomiasheista. Mutta plasti-imuröörit, siinä meni raja. Se oli viimi vuona se, ja mitähän net meiđän johtaajat aikkoovat kielttäät tänä vuona? Piian kielethään karhukorvat kläppiin genseriissä?
Teknoloogilinen etheenpäinmeno ja vihrinen muutos pareman tulleevaisuuđen puolesta. Minkä tulleevaisuuđen?