Tervettulemaa Suomi

Se oon surkkee ette kallhiita resurssiita häyttyy käyttäät ylösvarustelhuun ja puolustuksheen. Viskata tyyhään sotamasiinhiin millä ei ole muuta pittoo ko tuhhoominen. Siihen oon syy ette ko hunsvotit hajjoittaavat tieraama-apparaattiita ja pyssisuojii, se sitä käskethään raiskaamiseksi.

Men mailma nyt oon mikä se oon, ja nyt meiđän hyvä krannimaa Suomi ooh yksi niistä jokka ei hoksaa muuta konstii ko puristaat käđen nyrkkhiin ja varustaat ittensä pahhiiman varale. Suomi oon jo Pohjaisen militäärinen suurvalta, ja ko se nyt tullee myötä NATO:nlaisheen puolustusallianshiin, ei heiđänkhään pääle ennää pysty karistamhaan.

Ryssänmaa oon paljastanu ittestänsä paljon siinä ko oon hyökäny Ukrainan pääle, muun myötä oman militäärisen taitamattomuuđen. Sotalaisen ammatthiin kuuluu nykyään kompetansi, ja se oon sama ko pilkata sotalaisen ammattii ette lähättäät ulos «hunsvottiita masiinikiväärin kansa.»

Pohjaisessa met olema kasunheet ylös niin käsketyn ryssän karfuun kalvheessa. ”Koska ryssä tullee?” kysythiin ihmiset, ja met tunsima ittemä pieneksi ja heikoksi. Halu nähđä ryssät siivona isonaveljenä – se oli rajaton. Met olema työtelheet ja raatanheet ette eläisimmä ystävinnä ja sovussa, nyt oon pettymys pohjaton.

Ko uhka viimi vuođen aikana kasus, kansa kysymys kunka väkevä militäärivoima Ryssänmaala tođesti oon, tuli aktuaaliseksi. Silloin met löysimä interessantin artikkelin sivulta forskning.no vuođelta 2018 minkä oli kirjoittannu ruottalainen tutkiija, varhempi kenraalimajuri Karlis Neretnieks. Hän poisti meiltä sen fataalisen tuntheen ette meiđän isoveli öystässä jonaki päivänä saattais ittäät meiđän kotivuonhoin ja reuhastaat niin ko halluu. Karlis kirjoitti:

«Jos met panema yhtheen Suomen, Ruottin ja Norjan militäärivoimat, se meilä oon tođesti vaikuttaava iskuvoima. Siitä tullee isompi ko mitä Ryssänmaala oon kovossa täälä meiđän osassa mailmaa.»

Met olisimma mielelä puhunheet kesän kväänifestivaaliista ja muusta somasta, mutta se oon kansa hyvä ko saattaa tukkeet meiđän huolestunutta krannii. Tutkiija lopetti kirjoituksen näin:

«Se olisi hyväksi kaikile pohjaismaile jos kansa Ruotti ja Suomi tultais NATO:n jäseneksi.»

Näyttää ette niissä sanoissa oli etiäinen. Met toivotamma syđämellisesti tervettulemaa.