El souper d’chu stchelette (4/7)

Et pi ch’fantonme il o dispéru conme il avoait vnu.

Quante iz ont tè un molé rapurèes, Adphonsine al o foait pronmette à zz’eutes d’én janmoais rien raconter d’éch qui s’étoait passè c’soér-lo.

Chés chonq bigotes iz ont jurè d’én janmoais n’in perler à parson-ne.Gaëtan, li, pindant ch’temps-lo, fin contint d’sin coeup, il o tè ramner chu crâne à ch’chinmtiére.

Arrivè au bord d’éch treu, li, Gaëtan la maliche, il o appreuchè ch’crâne d’és bouque, et i y o glinchè, tout duchmint à sn’eureille :

Min tchot stchelette, au soér, tu m’os don-nè bien du plaisi. Adon, pour ét pein-ne, mi, din tchinze jours, éj t’invite à souper aveuc mi !

Et pi il o raplachè ch’crâne d’où qu’ch’est qu’il avoait ieu, et pi il o rintrè s’coutcher.

Él lin-nmain au matin, forchémint, tout ch’village il étoait au courant d’échl histoére d’éch fantonme, et pi meume, à ch’qu’o disoait, qu’échl Alphonsine a nn’avoait mouillè sin plantcher in l’voéyant !

Chés tchinze jours iz ont passè conme inne lette à la poste. Gaëtan i n’pinsoait meume pu à sn’avinture.

Éch soér-lo, il étoait in route à foaire guersiller inne cope d’hérings din s’poéyelle, quante oz o butchè à sin pothuis.

Rintrez, qu’il o foait… (à suire esmaine tchi-vient)