Saprè beudet ! (1/5)

Oh, qu’i n’y o du temps, d’tout o ! Gramint, gramint du temps ! Tellemint d’temps qu’o n’sait meume pu si ch’étoait hier, in-nhui, o bien dmain… A ch’momint-lo, don, din un tchot ratchuin d’Picardie, i y avoait deux tout tchots poéyis, côte-côte : éch poéyi d’chés asteux, et pi ch’poéyi d’chés naïus (o n’dirons point ltchel éq ch’étoait, pour én point frincholer parson.ne !).

Un coeup, à l’rousèe, un jonne honme d’éch poéyi d’chés naïus il étoait incrintchè in heut d’un abe, in route à soéyer un.ne branque din sin corti. O m’direz : i n’y o mie rien d’drôle à o, seulmint vlo : il étoait in route à coper chol branque qu’il étoait assis dsur, intré li et pi chl’abe ! O dit à msure, ch’est aladon : un.ne vieille métchingne d’éch poéyi d’chés asteux al o vnue à passer pèr lo. In voéyant ch’tableu, al lanche conme o à ch’naïu agvalè su s’branque : « Hé, ti là-bos, aie soin ! Méfit’t à ti ! Si tu continues conme o, mi j’t’él dis, tu n’sros pu long à tchèr à terre ! »

Édpi sin perchoér, l’eute i y o déclatchè : « Otchuppe-té d’ti, hé, mêle-seuce ! Tu n’voés point qu’éj sus-t-in route à soéyer un.ne branque éd min gueudjer ? Et pi tu peux m’croére : jé n’sus point d’lo d’tchèr, pasqué j’sus rudemint bien installè dsur ! Allez, passe tin cmin, hé, landjuse ! » Et pi, in disant o, i dansinoait, i guérinoait su s’branque, fin contint d’li. Et pi ch’naïu il o rprins à soéyer d’pu belle. Il y mettoait tout sin tchoeur. A foait qu’éch qui dvoait arriver est arrivè : badaboum ! Il o tcheu à terre din un pourdouf du diabe…. (à suire ésmaine tchi-vient)