Chés deux bochus (1/10)
Un coeup, ch’étoait i y o gramint, gramint du temps (du temps qu’chés glaines iz avoait’t coér des dints !), i y avoait deux bochus qui travailloait’t conme hourets din inne pieute cinse, du côtè d’Marcheville, in bordure éd chol foéreut d’Quercy.
Un bieu jour, d’ermontèe, éch moaite éd chol cinse il o nmandè à un d’chés deux bochus, échti qui s’appeloait Joseph, d’aller mner inne borse, rimplie d’étchus, à sin notaire, à Quercy. A ch’momint-lo, quiques tchilométes à pied, a n’foaisoait mie si tant peur qu’in-nhui.
À Quercy, éch notaire ch’étoait un viu jon-ne honme, boin chrétien pi boin fiu, qu’il aimoait bien la compagnie, bien boére, pi bien minger. No bochu, édvant d’erpartir, il o tè invitè à partager un morcieu. I n’o mie rfusè, bié seur, et pi i s’a papetè aveuc dol soupe à l’glaine, aveuc des zius d’din, dol glaine à l’seuce blanque, aveuc chés boins lédjeumes d’éch gardin, un.ne aflique éd glaine froéde aveuc des coeutchilles, inne gattelette éd crinme à z’oeus, et pi inne cope éd querpettes à confitures éd greuseilles. Sans oblier, naturellemint, ch’cafè, éch pousse-cafè, chol bistouille, chol rinchette, chol pousse-rinchette, éch canèrd, chl’euson, ch’gloria, éch toute-insan.ne, et pi ch’tricolore ! Pour foaire déchin.ne tout o, il o follu n’in définir, forchémint, aveuc inne boéne gobe éd flippe feumant pi bien chucrè.
Infin, ch’bochu il o tout d’minme erprins sin halot d’épin-ne et pi il o dit adè… Pour povoér rintrer à s’moaison, i folloait qu’i trécope chol granne foéreut d’Quercy. I s’sintoait biénaise : il avoait l’pieu d’és panche tindue à cratcher, és boutinette à mitan équeutchèe. El nuit al étoait douche, chol leune, él solé d’chés leups, al miloait in travers chés branques… (à suire ésmaine tchi-vient)