Chés deux bochus (2/10)

Joseph, és panche plein-ne et pi sin tchoeur éljére, il o sintu un.ne invie d’canter qu’a li décatouilloait sin gasiot. I n’o point térintè davintage : il o inton-nè djaimint « Malbrough s’in vo-t-in djerre », pi il o rattatchè aveuc « Chu boin roé Dagobert il o infilè s’tchulotte à l’invers ». Qué plaisi ! I n’in riotait tout seu din ses bèrbes ! Pi tout d’un coeup, il o san-nè à Joseph qu’chés buchons, su sin cmin, i frémichoait’t…

Alintour éd li, a guérinoait, a guérinoait ! Pi ch’est lo qu’édvant ses zius, ses zius qui s’arrondichoait’t conme des tchus d’gatte, ses zius qui s’satchoait’t d’és caouette conme des pronnes, qui s’infloait’t conme des panches d’hourlons, Joseph il o aperchu, qui s’démuchoait’t éd driére chés ronches, chés plés d’herbe, chés choques, chés feutchéres, toute un.ne binde éd piots goblins d’chol foéreut : chés rouliers, chés botteus, chés fioles, chés éternueus, chés feuxfus, chés houppeus, chés herminettes…

Tertous iz étoait’t lo din leus pu belles habillures, aveuc leus capieux d’mériage, leus rouilléres neuves, leus lévites aveuc du dor à leus manches, leus croates in soèe, et pi leus solers chirès. Tertous iz étoait’t lo, qui ll’erbéyoait’t, indsous chol leune qu’al miloait, pi d’chés étoéles qui s’alleumoait’t. I y in avoait des chintain-nes, qui ll’inchercloait’t.

Joseph il avoait sin djidji un molé sarrè, mais i s’a sintu rasseurè in voéyant l’doucheur au fond d’leus zius et pi leus boins sourires à leus lippes…

Échti qui san-noait chu chéf i s’a appreuchè, i s’a défulè…(à suire ésmaine tchi-vient)