Chés deux bochus (4/10)
Chu chéf il o clatchè din ses mains, et pi, su chl’herbe, milante éd rousèe, oz o peu vir appéroaite un véritabe bantchet : dol courèe, dol flamique, dol badrèe, du bisteu, du vin, du cite, dol goutte, du gâtieu battu. Joseph il o infitchè, ilo intassè, il o infornè din s’gargate. Chés goblins, leus zius satchès conme des pron-nes, i n’in rvénoait’té point d’vir qu’o povoait intasser tant qu’o din sin djidji !
Et pi ch’bal il o rprins : chés musiques, chés danses, chés calipettes, chés tchutromblets. Achteure, chés piots goblins i cantoait’t à à tue-tête leu canchon favorite : Lundi, mardi, merquédi, Jeudi, vintredi, sinmdi…
Pi i i gigotoait’t, i guérinoait’t, i s’teurtignoait’t ! Joseph i cantoait aveuc ses nouvieux amis, à s’én n’équeutcher sin gasiot, quante tout d’un coeup, din s’tête, il o pinsè : « A m’san-ne un molé corte, leu smain-ne, à chés piots nazus-lo ! » Et pi lo, din s’chervelle in fu, il o trachè à s’ramintuvoér : il o rcomptè, à l’invers, à l’indroét. « Sié ! no smain-ne à nous-eutes al est pu longue éq o ! »
I s’rindoait bien compte qu’i n’in mantchoait un, d’jour, oui, mais seulmint : éltchél ? Josepht il o foait un.ne grignèe. Il o rfrignè ses sorzius. I s’a dégrattè ses boéyeux d’chervelle. I n’in suait des gouttes conme des pronnes !... Pi tout d’un coeup, din s’caouette, inne étinchelle : « J’y sus : DIMINCHE ! I leu manque éch diminche, à leu canchon ! Et pi lo, i ll’o rprins, chol canchon, à li tout seu :
Lundi, mardi, merquédi, Jeudi, vintredi, sinmdi, diminche, pi ch’est fini !
(à suire ésmainne tchi-vient)