En Occitan Sioplèt !

Butar pas la menina

A una menina de setanta ans que tombèt dins una manifestacion e que foguèt grèvament nafrada li foguèt respondut que s’ac èra plan cercat : las personas annadidas, freulas o de mobilitat redusida an pas a anar manifestar e encara mens a un endreit que los recampaments i son estats proïbits ; es una question de rason e de sapiéncia.

En efièch, uèi, manifestar es vengut dangierós e aquela practica ciutadana e democratica demanda capacitats fisicas qu’avèm pas mai o qu’avèm mens, a mesura que las annadas s’amolonan sus la nòstra esquina. Çaquelà, podèm èsser vièlhs e aver benlèu una repotegada de far, una injustícia de denonciar.

Quina solucion ? Proïbir las manifestacions a las personas freulas ? Obligar de passar una visita medicala coma se fa pels espòrts e d’aver per manifestar un certificat, una atestacion que precisa que la persona es apta a recebre trucs e patacs, a resistir a las butassadas, alenar gazes lacrimogèns e corre pron viste per escapar a las cargas de las fòrças de l’òrdre. Mas aquò seriá tornar botar en question lo dreit de manifestar, e las repotegadas e segurament las manifestacions pel dreit de manifestar mancarián pas !

Una autra solucion seriá de reservar dins las manifestacions plaças, espandis, per las personas ancianas o freulas, coma se far dins los luòcs publics, los pargues de las veituras, los transpòrts en comun. O encara melhor d’organizar las manifestacions dins los estadis, aisits de securizar, que jovents e vièlhs, valides e andicapats, s’i poirián recampar, encerclats e aparats per l’armada e la polícia.

Una autra solucion seriá d’escotar los vièlhs, de s’avisar de la siá preséncia, d’analisar los sius besonhs, la siá condicion, e de portar los remèdis qu’i fan mestièr, de tal biais que ne pèrdan l’enveja de manifestar. Bilheta de Bernat Bergé.