Le Petit Journal - L'hebdo du Pays Toulousain
En Occitan Sioplèt !
A la debuta de l’epidemia, coma las masquetas mancavan bravament, una crida foguèt lançada e entenduda, que totes, benevòls e entrepresas convertidas, se botèron a ne fargar en teissut : un esfòrç nacional que foguèt soslinhat, mercejat, lausenjat. Mas, al moment que foguèrem deslargats, s’avisèron que las masquetas produsidas a molonadas e concurrenciadas per las a escampar, vengudas de China, se vendián pas. Per enfiaçar aquela subreproduccion e apasimar las repotegadas dels productors, se pòt encoratjar lo consum, per exemple en butant lo monde a davalar dins la carrièra, en respectant çaquelà los gèsts-barradura, e mai que mai lo pòrt de la masqueta. Per aquò far, sufís de prepausar mesuras coma onors e prima a las blòdas blancas, e trigossar per aumentar los sius salaris e los mejans de l’espital, de mormolhejar d’aumentar lo temps de trabalh, de diminuir los salaris, de licenciar, de tornar botar sul taulièr la refòrma de las retiradas… Aital, lo 14 de junh, los policièrs, conprenguèron plan l’injoncion del siu ministre que lor veniá de suprimir la clau d’escanament, e trantalhèron pas, los primièrs, d’anar, plaça de l’Estela e als Aliscamps, manifestar, mentre que la defensa n’èra pas encara levada. La manifestacion se debanèt sens violéncias, sens cap d’interpelacion, de butassada, de batanada, de carga, d’explosion de granadas de desencerclament, de tirs de balas de defensa, de gazes lacrimogèns… Una capitada del ministre ! D’autres deurián seguir lo siu exemple. Poirián tanben soslinhar que la masqueta, en mai de barradura al vírus, apara dels gazes lacrimogèns e assegura l’anonimat davant las camèras de susvelhança. E aital, se milierats de personas davalan dins las carrièras, la subreproduccion de las masquetas serà resolguda. Bilheta de Bernat Bergé.