Le Petit Journal - L'hebdo du Pays Toulousain
Lo retorn de la mostarda
Una bona novèla, crida la premsa unanima, la fin del patiment, de la carestiá, de la privacion, de las laissas vuidas, de la vida dessaborosa, sens picant: la mostarda es a tornar, la mostarda torna! En Borgonha la recòlta 2022 de las preciosas granas tòca las cimas, los rendements son superiors d’un tèrç alos de l’an passat, se regaudisson los productors; a aquela produccion excepcionala cal ajustar l’arribadade las granas americanas. Aital, asseguran los mostardièrs, serem tornats a una produccion normala tre la fin de l’annada. Rai d’esperar qualques meses, aurem de mostarda aquí ne vòls, aquí n’as, a ne onchar los patanons, las grasilhadas, los rostits, a’n assasonar las ensaladas, los pès de vedèl ravigòta, a ne tostejar lescas de pan! Es l’alegria, un sospir de solaç que s’escapa de totas las gargantas: òc, la mostarda es a tornar! Çaquelà, per èsser onèste, aquel regaudiment es benlèu pas a fèt partejat per totes, e d’unes aurián autant plan desirat que la carestiá durèsse encara un momenton. Ja, malgrat las laissas vuidas, mentre que oposicions e majoritat avián pas que fons de topins de mostarda seca a curar, los esternudaments an pasmancat a la Cramba al moment del vòte de la lei finanças rectificativa e de la de l’aumentacion del «poderde crompar». Qué serà quand los deputats auràn en abondància una mostarda fresca que monta encara maiaisidament al nas? Amics legeires,
Soi pas en mesura de far paréisser las bilhetas venentas, e vos prègui de me’n desencusar. Tornaràn començar lo 8 de setembre. Tenètzvos fièrs e galhards