Una mosca dins l’urinador

Los japoneses, aclapats per la crisi cèrcan desesperadament solucions per se redusir lo deute. Per aquò far, lo fisc a lançada una campanha, l’operacion saké viva , un concors d’eslogans que rendrián l’alcoòl mai atractiu en çò dels 20-39 ans. Cal dire que lo consum d’alcoòl a conegut una casuda de 25% de 1995 a 2020 e la siá part dins las recèptas fiscalas totalas es passada de 5% en 1980 a 1,7% en 2020. D’unes benlèu pensaràn qu’aquela campanha d’encoratjar lo beure es una vergonha, l’alcoòl consideratcoma un vici e coma una malautiá. Mancaràn pas de rampelar las campanhas que coneguèron, aicí, contralo flagèl del alcoolisme. Çaquelà la nòstra situacion budgetària es pas flame-flame e los nòstres menairesse calcinan tanben per redusir lo pes del deute. E aicí tanben una aumentacion del consum d’alcoòl portariá una aumentacion plan benvenguda de las recèptas fiscalas. Çaquelà, aicí, una campanha a la japonesa demorant impensabla, poiriam préner grana sus una experiéncia olandesa. Dins los urinadors de l’aeropòrt d’Amsterdam, per butar los òmes a melhor afustare mens lordejar, agèron l’idèia d’i gravar una mosca. Aquela mosca tota soleta permetèt una baissa de 80% de las despensas de netejatge dels comuns. Poiriam, nosautres tanben procedir en doçor, perpichonas afiscadas (nutge en francés), en remenant lo sanclame del jorn e de la nuèit, la nòstra situacion,lo pes del nòstre malastre e aital, sens ne prononciar lo nom, nos butar tot docetament a nos cercar losolaç dins l’alcoòl.E la creissença del consum d’alcoòl en mai de portar pèira a l’equilibre del budget de l’Estat poiriá entrainar una reduccion de l’esperança de vida, e contribuir aital a la salvason de las caissas de pension de retirada, autre pensament del moment.A la bona vòstra!

Une mouche dans un urinoir .......