A la taula setòria

A Seta, los plats an de gost e una istòria e lo libre La Cuisine sétoise de Jean Brunelin vos met l’aiga a la boca. Vertadièra biblía de la cosina setòria, ven d’èsser publicat per las edicions L’AN Demain : un obratge de 192 paginas, polidament illustrat.

L’autor setòri foguèt fotograf a Paris-match, puèi restaurator al Cap d’agde, a Seta, a Ibiza, abans de tornar a Seta menar lo restaurant La Marine, fins a 2010.

Uèit recèptas incontornablas

A Seta, dos mondes s’opausan : los que son virats cap a l’estanh de Taur e los que se noirisson de la mar.

L’autor s’atarda sus las uèit recèptas que fan la fama de la taula setòria. Al mitan, de totes aqueles produits de la mar e de l’estanh, senhoreja la macaronada : de pastas, de tomatat, de carn de buòu, costelons e salsissas. Se l’òm se fasiá una bonheta al dinnar del dimenge, pas question de cambiar sa camisa blanca. La bonheta èra lo signe qu’a miègjorn, n’aviás manjat !

La tièla de pofre es una recèpta tradicionala venguda d’italia popularizada a comptar de 1937. Los autres plats bèls son : los muscles farcits a la setòria, la borrida de baudròia, la rolha de sèpia, los encornets farcits, l’aiga-sal.

De la Punta Corta al Quartièr Naut

L’autor presenta 35 recèptas a basa de peisses e muscles de l’estanh. Seguisson 25 recèptas pel Quartièr-naut amb ton (3 recèptas), anchòias (6 recèptas), pofres (3 recèptas)… Traparetz 25 autras recèptas ont calamars, sardas, merluça, meletas, ustras, cambaròts e cotèls son a l’onor. Las originas italianas se pòdon pas amagar amb 21 recèptas a basa de pastas : spaghettis, raviolis, tagliatelle,… Aquelas recèptas son pas al menut dels restaurants : son vertadièrs plats populars de familha.

Las paginas dels dessèrts celèbran lo frescati : « un disque de pâte sablée-sucrée supportant un biscuit de raisins blonds gorgés de rhum, lui-même surmonté d’une meringue italienne » e « un glacé d’un fondant café » per enraubar lo tot.

A legir lo libre, las sabors vos vendràn en boca.