Le Petit Journal - L'hebdo local de l'Aude
Es la dintrada…
Aquí la debuta de setembre. Mecanicament, torna lo temps de la dintrada : la nostalgia de l’enfança e de la joinessa per d’unes, la jòia de tornar trapar los collègas per d’autres, los plors pel pichon que los parents abandonan dins una granda cort.
Es lo temps de la dintrada, mas tot se complica. Pareis que se cercatz un trabalh, vos sufís de traversar la carrièra, de trapar la primièra escòla (collègi, licèu o universitat) sus vòstre camin e vos aculhiràn braces dobèrts per vos butar sens autra fòrma de procès dins una classa fàcia a pichonets, grandets o adolescents per explicar lo perqué e lo cossí de causas que ne sabètz pas lo primièr mot. Mas, en bon.a ciutadan.a, respondretz atal a la demanda governamentala per que lo sistèma educatiu foncione amb lo nombre (sul papièr) d’ensenhaires que cal.
Ton cartable s’emplenava de libres e de quasèrns. Se passava la serada a l’espròva tarribla de recobrir los libres : amb lo papièr, aquò anava encara, mas quand se passèt al plastic… Te caliá ta provision de bilhas per desquilhar los pichons soldats o jogar al Torn de França al pè de la platana de la cort. E veniá lo primièr poèma d’aprene : èra pas un bon exemple per te motivar a trabalhar. Se parlava d’una mandra que se fasiá portar malauta per pas vendemiar. « Aqueles rasims son tròp verds ! », çai veniá !
« Setembre, temps de vendémias » ? La flaira a rasim e a most per carrièras, las còlhas ont se parlava occitan, catalan o castelhan, tota una populacion que viviá al ritme de la recòlta bèla… Ara, las maquinas de vendemiar fan plan mens de bruch, d’autant mai qu’òbran de nuèit e que, lèu, amb la pujada del rescalfament climatic, se vendemiarà en julh (o per Sant-joan d’estiu) e que setembre serà lo mes de la poda. E sabètz, vosaus, de que beu e manja la maquina al moment del Diusac-vòl ?
Setembre es tanben lo temps de tornar prene las activitats associativas, los entrainaments e los rescontres esportius (o de tornar trapar los amics a l’estanquet de l’estadi) !