Sèm totes de Dragons !

Aqueste divendres 9 de setembre, los Dragons catalans jogaràn dins lor estadifetiche de Brutús la partida qualificativa per las mièjafinalas de la Super-liga. Dins un estadi que deuriá afichar complet, seràn los pòrta-bandièras del XIII occitan e catalan.

Cal plan dire que se lo club jòga fòrt e fèrme sus l’identitat catalana, sus la pelena, se trapa gaire de… Catalans. Fòra los jogaires venguts dels Antipòdis o d’anglatèrra, los autres son de bons Occitans, d’aude, Tarn o Provença ! Mas l’identificacion a una equipa passa al-delà d’aquels critèris. Aprèp aver manjat un entrepan amb salsissa catalana e cebas o rosegat quatre o cinc churros, es a plèc de gargalhòl que se repren Els Segadors abans l’entama de las partidas e que se cridarà en ritme : « Catalans ! Catalans ! ».

Es recomandat d’aver un còr que ten lo còp, qu’ongan los sang-e-aur nos faguèron quauquas misèrias : coma quand menavan 306 contra Leeds e que se petacèron per pèrdre 36-32 en un vintenat de minutas o quand pareguèron d’anmas en pena sus la pelena fàcia a Salfòrd. En contra, te fan espetar de jòia quand capitan de batre Sant-helens.

De tot biais, las desfaitas an totas una bona explica : l’arbitre anglés que vei pas las montadas fòra-jòc e las passas en abans dels adversaris e qu’a una tendéncia bèla de sortir los cartons jaunes (e de còps roge) pels Catalans ! La responsa qu’an de trapar los Dragons es d’una granda simplicitat : èsser mai fòrts, mai solidaris, mai creatius que l’adversari.

L’interès dels sostens angleses es la moneda que fan dintrar dins lo comèrci local amb la consomacion sens moderacion de cervesa. De mai, botan un ambient de primièra amb unas cançons e pòrtan fièrament los malhòts de lor formacion. Coma sèm pas al fobal, tot se passa fòrt plan que sèm totes aquí per la comunion a l’entorn de la pauma ovala.

E que vengue octobre per tornar trapar lo campion Carcassona, Limós, Lesinhan, Vilagalhenc-argon, Ferrals, Pomàs, los Vals, Bèlvéser… sus las pelenas !