Le Petit Journal - L'hebdo local de l'Aude
Per l’occitan a l’escòla !
L’occitan a l’escòla, de la mairala a l’universitat, es una revendicacion de contunh del moviment occitan. E se pòt plan dire que las causas son pas simplas. Existís un brave blocatge en França sus las questions linguisticas. Entre Academia francesa e jacobinisme, d’una part, ensajan de faire creire dempuèi sègles que l’uman ideal (òme o femna) naisserà de la mestresa totala del francés ; d’autra part, actualament, a totes los nivèls, se plegan servilament fàcia a una autra lenga dominanta : un anglés aflqaquit e mondializat.
Dins aquel afar, demòra gaire de plaça ni per las lengas territorializadas de França, nimai per totes los apòrts estrangièrs.
Marrits exemples
Lo vòte de la lei Molac a la prima de 2021 a entredobèrt unas pòrtas per un possible espandiment. Mas sul tarrenc, al collègi de Narbona ont se fa un ensenhament d’occitan, an esperat una mesada per veire nomenat un professor. A Julian, en Bigòrra, los escolans de classas bilengas del public se trapan amb un ensenhaire pas fotut de dire un mot en lenga d’òc. A Caramaus, la Calandreta locala a degut barrar las pòrtas que la Comuna volguèt pas mai lor i logar lo local necessari : an doblidat los plaidejars de
Jaurés per l’ensenhament de l’occitan. L’organizacion del licèu a fait demesir lo nombre de liceans que seguisson corses d’occitan ; gaire de liceans, vòl dire gaire d’estudiants ; …
Es plan polit de dobrir un Centre Internacional de la Lenga Francesa, de magnifiar d’un costat e de mespresar de l’autre. A totes de dire que del mesprètz, n’i a pro !
Una brava discutida Los Dijòus-escritura clavaràn lor edicion de 2022 per la venguda de 2 universitaris de Tolosa, Martina Boudet e Saïd Benjelloun, lo dijòus 13 d’octobre (18h30) a l’ostal Sirventés (la Trivala, Carcassona) que mostraràn tota la riquesa dels escambis entre lengas, la necessitat d’assegurar la mestresa de las lengas e de promòure un plurilinguisme dobèrt que comença aicí per una organizacion fòrta de l’ensenhament de l’occitan.