Le Petit Journal - L'hebdo local de l'Aude

Lo codonh es bona pasta

- Ò. C.

Dins son raconte Los 3 secrets de ma menina, l’escrivan carcassoné­s Ramon Gogaud (1928-1996) balhava la recèpta de la pasta de codonh :

« Secret de la pasta de codonhs : Préner polits codonhs madurs. Copar en quatre. Sortir las granas. Per mesura, metre los codonhs dins l’aiga fresca per pas que s’ennegrejen. Un còp tirada la pèl, los metre a trempar dins la bacina de coire ambe pro d’aiga. Los faire còire a fòc menut. Quand flasquejan jol det, arrestatz, son cuèits. Escampar, alavetz, aiga e tot, sus un sedaç apausat sus la grasala. Lo jus pòt servir per far gelèia. Puèi, quand son plan eissuts, los premissètz e fasètz rajar una liura de sucre tris per liura de frucha sus los codonhs del sedaç. Ara, viratz codonhs e sucre dins una grasala, trissatz amb un pilador juncas temps que sucre e codonhs fasquen qu’un. Per acabar, prenètz aquela pasta e l’adobatz dins de sietas de dos centimètre­s d’espessor. Asagatz encara un còp de sucre. Daissatz secar quatre o cinc jorns dins una pèça fresca. Podètz, tanben, faire bocinets de pasta de dos dets e los sarrar dins una boita tampada, totjorn al fresc. Vos faràn atal tota l’annada… se s’acaban pas tanlèu la primièra annada. »

E l’autor d’ajustar : « D’efèit, jamai de la vida, la pasta de codonhs de la miuna menina Loïsa despassèt pas una setmana. Jamai venguèt pas rança. Jamai la daissèrem pas mosir ! E m’arribava, d’amagat, d’anar faire un torn dins la sala de manjar, de levar lo linge del plat de la pasta e de ne faire una lisca, al cotèl, e de me l’enfilar d’arrèu. Qu’aquel bocin, cresi, èra plan melhor que lo que se servissiá a taula, coma dessèrt per tota la familha. »

Lo codonh es la frucha del codonhièr. Se ditz « jaune coma un codonh » ; « ai lo codonh » : quicòm me pesa sul còr. Se pòt faire dire de mai en mai vite : Un codonh per vos, madama ; dos codonhs per vos, monsur ; tres codonhs per vos, madama ; quatre codonhs… e s’espetar de rire quand lo recitant o la diseira remplaça codonh per colhon !

 ?? - Crédits : Valentyn Volkov ?? Des coings
- Crédits : Valentyn Volkov Des coings
 ?? ??

Newspapers in French

Newspapers from France