Le Petit Journal - L'hebdo local de l'Aude
Agaches occitano-catalans
Fa vint ans se teniá a Narbona un Eurocongrès occitano-catalan. Aqueste divendres 9 de decembre, se debanaràn unes rescontres long de la jornada a Narbovia.
L’idèia centrala del recampament, dobèrt a totas e totes, es aquesta :«La construccion europèa se presenta coma la bona escala per tractar d’una tièrade problèmas economics, socials, politics e mai environamentals. Las Euroregions son estadas pensadas coma de factors de coesion e son d’ont mai utilas dins lo cas transfrontalièr de « Pirenèus-méditerranèa » que la dimension culturala i ten una plaça importanta. Dins lo temps qu’una de las entitats s’esperfòrça d’enauçar son estatut, sens mancar d’amodar trebolicis e incertesas, l’euroregion pòt èsser un factor d’estabilitat qu’ajude a la resolucion dels problèmas e pòrte de responsas a las escomesas del sègle 21. »
Lo Collòqui es organizat pels partenaris istorics e fondadors de l’eurocongrès. Aquela jornada abordarà l’un puèi l’autre tres tèmas tractats per d’intervenents qualificats (3 sesilhas seguidas d’una taula redonda finala de conclusions « prospectivas » amb los intervenents politics) :
- 1) Istòria : Quina istòria contar suls espacis occitan e catalan ?
- 2) Lengas e culturas : proximitats e divergéncias.
- 3) Economia : ressorsas – mobilitats - desenvolopament mantenable – torisme.
Long de la jornada, se poirà veire la mòstra del CIRDÒC : Mil ans de cultura occitana. La jornada se clavarà pel recital de Sandra Hurtado-ròs e Gerard Zuchetto : Clamor : als vents de las amors, cants de l’exili.
De notar que la dobertura de la manifestacion se farà tre lo dijòus 8, amb una recepcion a la Comuna (18h) e un passa-carrièra cap a l’ostal occitan en cèrca d’un animal totemic per la capitala septimaniana.
La longa istòria comuna e la frairetat entre Occitanse Catalans a de besonh de ligams fòrts e de realizacions concrètas : lo dire, lo saber e tanben lo faire !
Participacion liura, mas inscripcion obligatòria. Contact : eurocat.tls@free.fr
L’euroregion al còr dels territòtis occitan e catalan (CIRDÒC)