Le Petit Journal - L'hebdo local de l'Aude
Faire Carnaval !
Aqueste dissabte 9 de març, lo Bonòme Carnaval serà de sortida a la Trivala, a Carcassona. Farà una virada al pè de Ciutat per Barbacana e Sant-gimèr abans de tornar al pè del Pont-vièlh ont se prepara ja son grand jutjament que la fin, mai que probable, serà pas una suspresa. De segur, òm se pòt acontentar de venir véser cossí se passa e mitralhar de fotografias las mascas, mas lo mai important seriá de vos desguisar, de tornar trapar lo sens primièr de la fèsta, d’èsser actor e non pas un espectator simplòt, de vos fondre dins la manifestacion.
A Limós tanplan, Carnaval va sus sa fin, amb las sortidas dels Bronzinaires e dels Rambalhurs aqueste dissabte 9, del Parador dimenge 10, dels Joves e dels Limosencs dissabte 16. Darrièras viradas jos las Arcadas
lo dimenge 17, menadas per las Femnas que son encargadas ongan del jutjament e de la cremacion quand lusiràn las estelas dins la nuèit de la Blanqueta.
Carnaval a un pauc perdut de son vam, la data del Dimars-gras es devenguda plan magrinèla sul calendièr e aquò es plan domatge. Carnaval pòt tornar èsser lo moment ont una comunautat se met en scèna, se desbarrassa dels problèmas vièlhs per tornar partir d’un bon pè e se reviscolar amb lo retorn de la prima.
Deuriá… Condicional
d’utilizar ara : abans, lo jutjament metiá sus la plaça publica unes problèmas de la vida vidanta, se’n preniá a çò que virava pas plan e als responsables de la situacion. Ara, se dises un mòt atal, segur que seràs bon per un procès en difamacion se capitan de demascar lo president, lo procuror o l’avocat del tribunal carnavalenc. Quicòm mai tanben : tot aquò preniá mai de fòrça en s’apiejant sus totas las riquesas de las formulacions e del vocabulari de la lenga occitana.
Non, volèm pas cabuçar dins la nostalgia, mas gaitar cap en abans e se dire que seriá una bona causa de tornar faire viure las tradicions ancestralas e tanben de desvolopar lo nombre de locutors en lenga nòstra ! Adieu, paure e brave Carnaval e a plan lèu !