Le Petit Journal - L'hebdo local de l'Aveyron
Amans Batut raconte “lo Cardinal e son tropèl”
Quand lo Cardinal Marty prenguèt sa retirada, sos fidèls parisencs li faguèron present d’una autò. Volguèt pas una Mercedès mas una simpla 2 CV : tornava pas al país per cranejar.
Un matin d’estiu, pas luènh de la bòria de La Vaissièira, dins lo valon de Marcilhac, a una virada, se trobèt nas e nas amb un tropèl de fedas.
En passant davant la 2 CV, lo pastre s’excusèt : «Vos aurai retardat, Mossur. Aquelas putas de bèstias son pas jamai pressadas.
- Vos tafuretz pas, brave Mossur. Sabi çò que vòl dire vòstre trabalh. Ai agut lo temps de remirar vostre tropèl : son plan polidas e devon èsser plan sonhadas.
- Sabètz, Mossur, que li fasèm lo perqué. - Quantas n’avètz aquí? - Un parelh de centenats. Mas, Mossur, ai idèa, a vòstre parlar, que vos i coneissètz dins nòstre trabalh.
- I me coneissi ben un pauc, pardí. Fau pastre, ieu tanben.
- Anem ! A veire vòstre vestit e vòstras mans finas, devètz pas rabalar pel fems!
- O fau pr’aquò, mas pas del mème biais. - Devètz aver un brave tropèl ?
- Pecaire ! Vos pòdi pas dire quantas n’ai. Mas a quicòm pròche n’ai mai de dos mila.
- Oi ! Fotre ! Devètz pas èsser sens trabalh quand tot aquò se met a anhelar. Mas, anem, francament, de qué fasètz coma mestièr ? Me sembla, a vos ausir, qu’avètz plan lo parlar d’apr’aicí…
- Soi l’evesque de París : Francés Marty.
- Coquin de sòrt ! Quantes de còps vos avèm vist a la television ! Venètz a l’ostal. Vos pagarem a beure que fa tròp escaumaci !
- Escusatz-me, mas pòdi pas.
- Me demòra un bocin de vin dins ma cocorda. Es del nòstre ostal, lo d’aquí ! Es natura. E me fariái un plaser de lo vos far tastar ! »
Lo Cardinal ne chuca un parelh de gorjadas e ajusta : « Es plan bon, es plan conservat. Mercé plan, brave òme ! Se jamai montatz a París, venètz me veire a l’evescat. »
Lo Cardinal montèt pas a París, mas per Nadal seguent reçaupèt un formatge de Ròcafòrt.