Le Petit Journal - L'hebdo local de l'Aveyron
« Confidéncias felinas » de Serge Gayral
Confidéncias felinas de Serge Gayral
(Grelh Roergàs, n°61,
2019) est le journal d’une chatte qui se demande ce qu’elle peut faire pour la fille, dépressive, de la famille.
« Es plan malurós, que n’i a de mai en mai de depressius, de joves e de vièlhs, d’òmes e de femnas d’un pauc totas las categorias socialas. Pretendon que la companhiá d’una bèstia – un cat, un can, un aucèl, un peis, un ase, un caval, eca – los pòt ajudar a anar melhor. Apèlan aquò la zooterapia... Me caldriá veire çò que pòdi far… Cal ajustar que las bèstias tanben pòdon èsser depressivas e sovent a causa dels òmes justament…
Sabètz ont m’agradi, sul relaisset de la fenèstra. Dedins, es al canton de la cheminièira, subretot l’ivèrn, plan segur. Soi pas de las que passan lor temps entraucadas al mièg d’un molon de coissinièiras moflas o suls genolhs del mond. Perqué ? I a de causas que s’explican pas. Deu èsser mon caractèr… o benlèu ai gardada dins mon inconscient la nafradura de l’esterilizacion… Cossí que siá, aquò es lo passat ; meni una vida tranquilla dins una familha que me sembla pro normala. Es per aquò que se podiái far quicòm per Paulina… Los òmes se dison de causas aimablas, mas ieu pòdi pas dire res. Los òmes se potonan, mas ieu pòdi pas potonar… Levat me sarrar d’ela e li frelhar las cambas, vesi pas çò que pòdi far. Lo problèma es qu’o fau pas jamai, qu’es pas dins ma natura… O pòdi dire, que soi pas qu’una paura bèstia que voldriá ajudar una paura femna en dificultat. Çò que me tafura es sa reaccion. Me sarrar d’ela es simple, mas cossí interpretarà mon compòrtament novèl ? Se pausarà de questions e poirai pas respondre. Sovent aimariái de poder respondre, de balhar mon vejaire sus un fum de causas. Pel moment, se fau quicòm, es pas per m’ocupar de çò que me regarda pas, es per ajudar una persona de la familha. Veirem ben. »