Le Petit Journal - L'hebdo local de l'Aveyron
Renaud Falissard : « Un cunh a blocada… la tèrra ? »
Jean Briane, président-fondateur du Rassemblement européen pour le respect des Temps universels coordonnés, remettait les pendules à l’heure. A son tour, Renaud Falissard suggère que le décalage horaire nous perturbe beaucoup :
Dissabte 29 d’octobre, quand me levère, un pauc abans uèch oras, fasiá nuèch. Dimenge, a la meteissa ora… miracle ! Lo solelh lusiá, èrem en plen jorn ? À tres oras del matin pantaissava, las pendulas se tanquèron !
Ère dins las brumas, roncava coma un tesson. Pr’aquò lo relòtge piquèt plan tres oras, puèi, la pendula electronica, una ora après, repiquèt tres còps ! La luna mièja esclairada s’èra aconsomida. Ausèt que sus tèrra, las agulhas dels relòtges, en faguent marcha arrèr, cruissián e gingolavan. En recuolent la paura ela faguèt un salt coma un gran de milh sus una pala !
Se diguèt : de qué sana ma vesina ? Qual sap se s’es arrestada de virar ? Pense pas que s’es aquiulada ? Benlèu quauquas farralhas o peirassas que vòlan dins los aires l‘an cunhada ! Es vertat, dempuèi qu’escampan d’apleches dins lo cèl, d’unses los a trucats e se son atraçats dins un caire per far fren ? Pr’aquò, sentiguère cap de saquejadas ? Les estèlas eissorbadas pel solelh vejère pas res fòra l’Estèla dels pastres. Sul còp, sajèt pas ont penjar lo lum ! Demorèt muda ? Finfinala, que se passèt ? Saique, dempuèi que tròta, voliá un pauc de repaus e s’es endormida pendent un ora, lo temps de polsar !
Vejère s’atropelar un modòl de volontaris per la desenganar. Amb de palfèrris, de pics e de palas fosèron. Una ora après, tot aquel modòl de ferralhas seguèt enlevat. Dels camions provesits d’una banasta o descarguèron. Sul pic, la tèrra tornèt virar e… m’arrevelhère ! Ai pro cercat a comprene çò que m’èra arribat ? I ai vist que pega ! M’es avís qu’aquela mascariá m’es venguda de las fachilièiras. Per que, ara, me trache que… passa l’òsca !