Le Petit Journal - L'hebdo local de l'Aveyron
Chantal Demarest : « Lo panèl sorisent »
Cette semaine, Chantal Demarest se penche sur les panneaux routiers dont on sait qu’ils donnent souvent des interdictions ou sont répressifs. « Pourtant, observe-t-elle, il y en a un nouveau qui me semble particulièrement sympathique… »
Davali la còsta per anar a La Vila. Un panèl ditz de menar a mens de setenta quilomètres a l’ora. Lo cal respectar mas des còps, avèm lo cap per las nivols… Aquel jorn, un second panèl, a la seguida, s‘aluca e me ditz que meni tròp viste. Freni sul pic e, dins un clacar de dets, càmbia e una cara sorisenta, coma las emoticonas del clavièr de l’ordinador, me sorís. Dejó es escrich « Mercés » !
Quina suspresa ! Me merceja perque ai ralentit e mai que mai, me sorís. Soi sola, mas m’espofi. Qu’es polit aquel messatge. M’agrada fòrça.
Lo còp d’après, pensi a anar de nonent, non pas per lo penar pas qu’es tant amable, non, mas per saber çò que va far... Me sorís e me ditz mercés un còp de mai. Ieu tanben sorissi. Tròbi aquel biais, que manca pas d’umor, plan ingeniós e simpatic. Al luòc de rondinar o, çò pièger, nos far pagar e prene nos punts, nos sona per nos prevenir que fasèm pas coma cal.
Òsca a la municipalitat que causiguèt aquel biais de comunicar.
Mas, me ven una idèa. Ne poirián metre d’autres. Imaginatz,un fuòc roge, tot beluquejant, que nos diga : « Bona jornada » lo matin, « Bona serada » al ser, « Bon apetís a miègjorn », « Bona
dimenjada » lo divendrès al ser. E de qué pensar de lo que diriá « Desencusatz nos de vos demandar de vos parcar pus luènh, aicí es dangerós » ? Tot Parièr : « Mercés d’anar pas per la carrièra d’aquel bias ».
Benlèu, nos fasent complices, amb un bocin d’umor, nos daissariam tòrcer e aquò nos ajudariá a segre la rega coma cal.
Se sap que lo biais de demandar val melhor que çò qu’es demandat.