Le Petit Journal - L'hebdo local de l'Aveyron
Le ChatGPT : une histoire insolite ?
« GPT, drôle de nom pour un chat ! » s’exclame Serge Gayral (Sèrgi Gairal). Explications.
Èri dins l’òrt quand ausiguèri la vesina sonar qualqu’un. Parèri l’aurelha e ausiguèri una forma verbala francesa, « j’ai pété », coma se cridava qualqu’un que se sonariá aital. Ne dedusiguèri qu’aviá perdut lo cap.
Me sarrèri prudentament de la clausura per li demandar çò que se passava. Me respondèt fòrt aimablament que s’adreiçava al cat. Coma me vesiá complètament estabosit, m’expliquèt que fasiá dos meses qu’aviá crompat un cat, que sabiá pas cossí lo batejar, qu’aviá legit dins un jornal « ChatGPT », e qu’aviá trobat original de lo sonar amb aquelas tres letras.
En se risent precisèt qu’aquel nom aviá pas res a veire amb lo vèrb « péter » francés ! Es alara qu’arribèt GPT, un cat d’una intelligéncia fòra nòrma, d’après la vesina, que se manifestèt tanlèu que lo sonèt GPT. GPT, un nom coma un autre fin finala, un nom qu’agradèt fòrça al cat de la vesina !
Es d’ausir que lo sonava GPT que li desrevelhèt l’intelligéncia al cat de la vesina ? Qué ne farà la paura bèstia s’es sonque una intelligéncia « artificiala » ? A qué li servirà ? Cada jorn nos contan que l’IA a començat de revolucionar la vida de l’Òme, dins mantun domeni, la medecina, lo trabalh, la justícia, l’ensenhament, l’economia, la meteorologia, l’agricultura… Tot aquò es plan interessant e sembla incontestable. L’IA va contunhar de se desvolopar inevitablament ; cal esperar que l’Òme siá capable de la mestrejar.
Mas cambiarà quicòm dins l’esperit, la mentalitat de l’Òme, las relacions umanas ? Es aquò la question, e mai la vida materiala siá considerablament melhorada. I aurà sus Tèrra mens de violéncia, d’asir, de coardisa, de missantisa, de gelosiá, de falsièira ? Ai plan paur que non, que i aja pas jamai cap de remèdi.