Le Petit Journal - L'hebdo local du Lot
Cal viure ambe soun temps
Ia un viel reprouverti que dis : cal viure ambe soun temps.
Ço que vol dire que lous temps cambion e que se cal adoubar amb aquelis cambiaments. Praquo es un ficut affar quand, coumo al temps que sèm, tout cambio talament biste que lou mounde n’es capvirat.
Tenets ! Lou maridage… Es pla malaisit de s’i retroubar, al joun d’aouèi, sus ço que ne cal pensar, quand ausissetz dous goujats ne parlar atal :
« Figuro-te, ço dis l’un, que la Marioun me presso de me maridar amb elo… Ai pla envijo d’acceptar.
-I pensos pas ! Respound l’autre. Reflechis pla abans de t’enganar dins un affar parèlh… Penso qu’en te maridant risquos d’estre encadenat pendent de meses !... »
E i a pas que lous jouves per ne parlar d’un biais estounant, lous parents tanben ! Coumo lous parents de la Lisetto e del Pierrou que, lours efants ajent decidat de se maridar, se soun rencountrats per reglar lous darnièrs detalhs.
« -La nostro filho, ço dis la mama de la Lisetto, es une filho de soun temps. Es elo que dirijo soun commerci e que meno lou camioun. A soun permis de casso e es champiouno de tir al fusilh…
-Qu’uno chaço ! s’exclamo la mama del Pierrou. Lou nostre efant, el, s’i entend coume digus per cousinejar un estoufet ou un gigot roustit, e se regalo de far la vaissèlo… Aqui un maridage que pod pas estre milhour reussit !»
Mes i a mai que pel maridage que las causos cambion.
« -Coumo sabetz dins lous ateliers e las usinos, tout es mecanisat. E, milhour qu’aquo, aro tout es de mai en mai automatisat.
-Autroment dit, soun las machinos que fan lou travalh en plaço dels omes. Atal Parpansot ajent l’oucasioun de vistalhar uno d’aquelos usinos ultra moudernisados quitabo pas de badar de ço que vesio.
-Aquelo machino que vesetz acqui, i expliquo lou patroun fa touto soulo lou travalh de quatre omes..
-Al diaple ! s’excalmo Parpansot estoumacat. Praquo quand disetz touto soulo, m’imagini que cal be qualqu’un per la faire marchar ?
-Plu sigur ! Per aquo abèm sièis especialistos ! »
Quand se dis que res arresto pas lou progres…