Ou belou Majou

A ra fen dou sécoulou des-e-vech, ent’a Prenchipautà de Moùnigou, pèr ou primou de majou, u coumpà fasìan piantà un erbou davant a pouarta du se coumà ; aquel’ erbou se sounava « ou majou ». Era engarnì de grilande fiourìe e de ribounete. De tout acò, a tradician de piantà ou « majou » ente cada carriera, s’ese perpetuàia. A jouventura balava à r’envirou en cantent de belle cansoù.

En 1848, u jouhe an piantà r’erbou en piaça de Lougette. A ra fen dou sécoulou des-e-nòu, r’erbou de majou ese stach rempiaçà d’un moutivou fiourì stendù dame de couarde d’un barcan à l’autre, e dessouta, a gent venìa virà ou majou e u caregnaire eran numerouse ! coum’acò, a tradician era ben counservàia e trasmetùa. U brandi se balavan à passe sguilhà e cuntà.

Apress a guèrra dou 14, u majou an perdù de vigourìa. Mà, verse 1926 a coustuma va repilhà fouarça fint’u anne 1960. Cada quartié avìa ou sen majou e a soua regina. A ra fen dou mes, se fasìa una granna festa : baleti e cansoù. Poc à poc, u majou noun san pu virà. Noun se canta pu ou roumanin fiouri, ou pichan cavagnet… Mà a tradician era trop viva. U nissarte coutinuan sempre a festa u majou e a munichipalità de Mentan fà una granna festa souta u aurevìe dou Pian pèr una bella dumenigàia dou mes de majou…

Pèr fenì, cantema tout ensem, a finala dou Pichan cavagnet de Louis Moreno e Angelo Graffione da Capelina de Mentan : « Belu jouhe d’en pèr aquì /Que cerqué a maria-vou / Sout’ou Majou qu’ese fiourì / Seran de belle seràie / E se vautre ou vouré / I sera de mariàie / Sensa dota n’aurema assé / Dam’un sòu que nou douneré. / Ou pichan cavagnet’au bras / Doun’ané belle garçoune ? / Tàia fina e lengìe ou pas / Ou pichan cavagnet’au bras. »