Un jorn de primavera ent’e couale-noaishe
Toute e erbe de campagne lusan d’un verd nòu e oundejan pian-pian sout’a brisa. U lilà han suchedù à u mimousà. Ou serengà es en festa e destila u se proufume enmascante. E platane de r’avengùa han pieijhé de dounà-nou un’oumbra que fa de ben en tant que da u cassìe cara a néu audouranta de soue petale. Aqueste san dejà – couma u voaishe trent’anne – levàie tout en un còu da un coarp de vent. Tout acò es embriagant pèr qù sa regalà-se d’aquelu proufumi d’un moument. Un cousp de primavere me counfîa qu’ese ben souret ent’aquelou valan secrét e me di que de vote chalabrouna dam’ ou valounet, aquelou que d’un temp fasìa girà ou defici Marcé. De vijhitoù ? Pran poc u jorne ra e grise, ma dam’ e prime quiaroù da primavera, u parpalhoù e ou pouèta se quinan susa da elou à ra recerca de shug qu’elu sourete counoushan. Toute ço que me canté ailì ese ben agreàbile ma partene au temp lìberou e au soann, de segù pèr scapà da realtà de cada jorn.
Pèr aquela bela fen d’una journàia d’abrì, recarou à pe da mìa campagna. Su anach à levà un poc d’erba puhi à aigà e favete.
Me su shalà dame ou cant dou merlou que ralegrava ra fen d’aquestou jorn. Puhi ra nuech es arribàia pian-pian. E granoulhe han coumença à parla-se d’una pesquiéra à r’autra aloura que r’audoù persistenta dou jaussemen m’envirouna dame finessa e m’ajuha à revenì en vila en me parlent dame douçoù de cause dou tempe passà.
Belou Majou
Pèr ou mes de majou a natura repilha fouarça. Ese r’oucasian de retrovà-se souta u aurevìe dou Pian e virà ou majou. D’un temp, a jouventura virava r’Erbou de Majou. Ente tout u cante da vila, s’e piacéte, ent’u carrouge se piantava ou Majou e cada-en vourìa avé ou pu belou de toute. A r’entorn d’una biga fiourìa, souta un belou moutivou engarnì de grilande e de lanterne, de fiouréte e de ribounéte, eliegìan a regina dou Majou. Païsà e pescahoù, mestierante e empiegà balavan u brandi tout’ e sere acoumpagnà da jorgina du musicante e autre strumente. Una cansan scricha pèr un poueta o cansounìe era eliegìa cansan ouficiala dou Majou. Louis Moreno, Eugène Granero, Marcel Firpo, Etienne Clérissi, Vincent Botta, Jacqueline Verdini, Marcel Viale, Maurice Naret, Solange Mongondry, Mauri Osicki, Auguste Maccari… an dounach de béle prouducioù. I n’ha d’aquelu que disan « Pèr Majou, pouhe fà ço que t’apieijhe ».
Mà à Mentan car marfia-se de frasque de Majou, aquele ramàie vioulente que vou scouran fint’u ouasse. S’ou mes de Majou es a festa de fioù, ou paìsan vive ent’a crenta pèr a soua campagna, e soue culture. Ese pèr acò que demanda a proutecian de Sant Isidorou, ou Patran-Sant du campagnoli.