Mait que la coexisténcia : la convivéncia

Un còp de mait vòli far de reclama per un libre : La convivéncia, la dernièra òbra de l’Alem Surre Garcia.

Fa qualquas annadas d’aquò, organizèi a l’Ostal d’Occitania de Tolosa un cicle de conferéncias de l’Alem Surre Garcia, e efectivament plan sovent s’i parlava de convivéncia. Aquel concèpt de convivéncia es comun a las culturas castilhana, catalana, prortuguesa… e occitana. L’autor definís la convivéncia coma ‘le biais de viure ensemble dins le respèct mutual de l’alteritat’.

Aquò vòl dire que coexistir e acceptar de viure ensemble, es a dire ame l’autre qu’es diferent, cèrtas es dejà quicòm, mès ne’s pas pron. Se cal tanben respectar e aquel respèct pòt pas èstre que mutual.

Dempèi las annadas 1980, aquela idèia qu’èra estada mait o mens abandonada, sembla que se volgue reviscolar, e torna interessar de mait en mait de monde, i compres qualques òmes politics e las institucions.

De vilas coma Madrid o Tolosa mait recentament an decidit d’un ‘Plan Convivéncia’ e podèm rasonablament esperar que d’accions concrètas dins les quartièrs saràn declinadas. En sens contra de l’ambient pessimista de declin e dels negacionismes de tota mena, que siàsquen religiós o laics, e qu’acceptan pas cap d’alteritat, la convivéncia pòt far partida de las responsas e participar a transformar e a amelhorar la societat.

Aquel libre plan complet es escrit en francés e donc accessible a totis. Alem Surre Garcia i respond a totas las questions que concernon la convivéncia, per exemple : D’ont es sortit aquel concèpt e de quand data, cun èra le contèxte istoric ? Cossí la convivéncia va al-delà de la tolerància e de la laïcitat ? Etc.

Alem Surre Garcia viu a Tolosa. Avèm aquí un ‘especialista’ d’aquel concept bravament important e interessant qu’es la convivéncia, e un defensur de prumièra de la cultura occitana. Aquel occitanista, bravament sapient, coneis perfètament l’istòria nòstra a començar per la civilizacion occitana dels trobadors, e produsís idèias.

Alem Surre Garcia escriu quora en occitan, quora en francés, e es tanben traductor, cronicaire, conferencièr, poèta, fillosòf…

■ Le libre se tròba dins totas las bonas librarias (15 €).Se pòt tanben comandar a l’editor : Editions Troba vox, 2, rue du romarin, 11200 Montseret. Tel : 06 08 33 56 44 - troba. vox@wanadoo.fr