DAT IS MI OPFULLEN...
Dbi’ne Nummer Een
Sport in Düütschland is Football. Dat is so un dat blifft so. Aver Football is ok een dueren Sport, ok wenn man blots tokieken will. In’t Fernsehen kann man sien Lieblingsvereen blots kieken, wenn man dorför düchtig betahlt un wenn man in’t Stadion will dann is dat ok een Spauß, bi de man deep in’t Knipp griepen mutt. Un wenn de Lieblingsvereen dann ok noch in de Bundesliga spölt, dann word dat man viegeliensch. So een Intrittskoort kann för’t Weserstadion to’n Bispill van 15 bit 70 Euro kosten, dat kummt dor up an of man stauhn of sitten will un tegen weke Mannskupp Bremen spölen mutt. Un geiht dat um een Spöl in’t DFB-Pokal oder Championsleague, dann word dat nochmoal düerer. Un wenn man sück dann al een Dack in Stadion günnt, dann mach man ok nich an Eeten un Drinken spoaren un köfft sück de een of anne Beer un viellicht ok noch een or twee Braadwust. Un wenn een wiers een grote Fan is, dann mutt man ok jichtenswat hebben, dat man dat ok sücht. De neeisten Trikots van Werder Bremen kösten um 85 Euro un so een Schaul kost ok man 15. Un wenn dat nu immer dürer woard, dann kann sück dat nicht jeedeen mehr leisten un dat was wiers schaud, denn ohn de Tokiekers, ohn de Fans is Football nix. Football leevt van de Stimmung in’t Stadion. Ik weet ok, dat de Stadion in Unnerholt dür is un de Trainers un de Footballspölers mutten ok betahlt worden, aver mutt dat wesen, dat dann alles so düer is? Un wenn man dann so vööl Geld utgeben hett un de eegen Mannskupp dann verleren deiht – dat deiht besünners sehr, aver jedeen hett nunmoal sien Lieblingsvereen, dat sücht man sück ja nich immer ut. So bit Lüttjen is aver de schöne Sport nich mehr för jedeen togänglich. In England is dat all so, dat sück blots noch de bobere Mittelschicht liesten kann in’t Staudion to gauhn, wiel de Intree doar all um 100 Euro kosten deiht. Dat maukt de heele Stimmung kött. Willn wi hopen, dat de Fußball, of in Stadion of vör’t Fernseher, nich mehr allwech dürerer warrt un jedeen sien Lieblingsvereen noch heel lang anfiern könnt.
Annika Eden