Hest’n Ogenblick Tiet?

Bi’t Heini Kunst-Huus geef’t vääl Patschwork to sehn. Patschwork is’n besunnere Aart van Handarbeit. Bi disse Warkeree kummt dat up vääl Arbeit mit’e Bannen up an. Säker, de Neihmaschien’ ward ok insett’t. Man in jed’t enkelt Stück sitt so mennig Nadelsteek mit in.

Patschwork kennt man ut fröhere, arme Tieden at Flickarbeit. Ut Tüüchstücken un Reste wurd wat „Nee’s“to’n Antehn tohoopsett’t. To’n – ward nu ok wat „patschworkt“. Man nu tellt dat at chick un modern. Meisttiets geiht dat aver um Däken van lütt bet groot. Pottlappen, Set’s, Dischdäken, ok Taschen un Büdels un mehr ward so maakt. Phantasie höört dar to un Muster utdenken. Den richtigen Stoff un vör all’n passende Farben utsöken, tohoopstellen un denn ward Hand anleggt. Kost Tiet un Gedüür. De sik dar recht mit befaten deit, seggt: Dat is at’n Süük. Kummst nich mehr van los. So kaamt ümmer mehr un nee’e Muster tostann’. Giff kien twee, de övereen utsehn doot.

Ende Juni geef’t in un um dat Heini Kunst-Huus woller ’n ganzen Deel van disse Kunstwarks to sehn. Vör’e Grootdöör up’e Wüpp gung dat los, de Schüür hung vull, an’n Huus langs ok, bi de Siedeldöör weern rund um den Koffeegaarn de Wände vullhungen mit vääl Prachtstücke un denn legen ok noch’n Masse in dat moie Huus up de Disch un Stöhl. Weern so wat 150 Stück of mehr. Weern dat Wark van 18 ievrige, patschworkbegeisterte Froenslüe, de to dat Wiefelstäder Köppel tohören doot. Un jed’een van disse Froens hett to dit Utstellen veer Koken backt un spendeert. Ganz hoch antoräken is dor bi, dat dat Geld, wat för Koffee un Koken un van de Tombola in de Kasse keem, half dat „Ambulante Hospiz“in Ollnborg un half dat Heini-Kunst-Huus to Gode keem.

An de beiden Daag weer ganz vääl Bedriev. Vääl Besökers hebbt ehr Intresse an de schönen Saken wiest. Dat gifft säker Moot för tokamen Jahr.