Dirk Klefer: Stolt up de „Blumenfee“un de fief Steerns
De Gorneree Kiefer in Augustfehn fiert in dat tokamen Johr: Se is denn 70 Johr in Gang. Dat een of anner Johr ward bi Familje Kiefer jümmer in dat Erinnern blieven, so ok dat Johr 2019. De Helpsfroo Annika Stroers wurd as „Deutsche Blumenfee 2019/2020“utsöcht, un meist to glieker Tiet is dat Familjenunnernehmen Klefer van de „4-Sterne Premium Gärtnerei“ganz na baben klattert to een „5-Sterne Premium Gärtnerei“. Dissen Titel dröövt in Neddersassen un Bremen bloots söss Firmen ehr Egen nömen, de dat mit den Zierplantenanboo to doon hefft. „Van een free Fachkommission (van‘n „Bundesverband der Einzelhandelsgärtner im Zentralverband Gartenbau“) hefft wi 96 van 100 Punke krägen – un dat maakt us nu doch so‘n beten stolt“, seggt Gärtnermeister Dirk Klefer, de al in de drütte Generation dat Unnernehmen in sien Hannen hett. Man dat is noch nich allns: Van de Gemeende Apen gifft dat in elkeen Johr (af un an ok all twee Johr) een Utteken för Firmen,
de in de Gemeende ganz wiet baben staht, un in dat vergangen Johr is disset Utteken de Gorneree Klefer tospraken wurrn.
Mit dat Motto „Früh übt sich . . .“hett Dirk Klefer al in jungen Johrn wiest, dat bi em Planten in gode Hannen sünd. Planten, de sien Öllern Hermann un Renate Klefer an‘n Siet schaven harrn, haal Dirk in sine lütte, egen Eck in‘n Gewächshuus un broch se woller to‘n Wassen. De gesunnen Planten gungen denn woller in‘n Verkoop. „Wecke sünd awer ok nich döörkamen, harr ik mi doch noch nich so recht kunnig maakt“, gifft Dirk to. Dat he maal up‘n Padd van sien Öllern lopen wull, stund för em jümmer fast. Schoolpraktikum un Lehrtiet maak he in de Gorneree Hettenhausen in Ocholt. So as de Firma van sien Öllern, harr ok de Lehrbedrief Hettenhausen dat besünners mit Zierplanten to doon. In de Gewächshüüs föhl he sich so recht to Huus: „Ik mag dat geern, wenn‘t moi warm is“, vertellt Dirk Klefer mit‘n Smustern. Na de Lehrtiet reep em de Bunderwehr. In de „Sicherungsstaffel“ in Schortens haap he up een sinnige Tiet, man just dat Gegendeel keem up em to. „De velen Manöver kunn ik uplest nich mehr tellen“. As de Tiet bi de Bundeswehr vörbi weer, wull DirkKlefer just för de Praxis noch wat tolehrn. In Zuffenhausen bi Stuttgart hett he bi „Pflanzen-Kölle“sien Hannen röögt, een Unnernehmen mit‘n ganzen Deel van Filialen un 1000 Helpslüüd. De junge Gorner ut Augustfehn kunn wiesen, dat he‘n Barg Weten van Planten hett un dat em dat an is, rejell wat to doon. Al na een korte Tiet kreeg he dat Leit van de Sparte för de Stauden. Dat weer een Upgaav, de kunn em woll gefallen; man na‘n Tiet wull Dirk noch mehr unner sien Ogen nehmen. Van‘n Süden in Düütschland gung dann woller in de Richt van de Heimat. Twee Johr warkel he bi de Gorneree Otten in Jever, ok hier in een Position, de mit veel Verantwortung to doon harr. „Ik heff van minen Chef Dieter Otten veel tolehrt. Een wunnerbor Tiet, de ward ik nie nich vergeten“, so seggt dat Dirk noch vandagen mit lüchten Ogen. He besoch de Meisterschool in Rostrup un gung 2004 – just „Gärtnermeister, Richtung Zierpflanzenanbau“wurrn – torüch in‘n Bedrief van sien Öllern. Sünd twee Generationen tohoop, denn kann dat ja vörkamen, dat dat Menen so‘n beten ut‘neen geiht. Man nich bi Familje Klefer. „Mine Öllern hefft an mi glöövt, un över dat, wat to investeern weer, weern us gau eenig“, vertellt Dirk Klefer. Siet veer Johrn hett he alleen dat Leit van dat Familjenunnernehmen. Dat junge Gorner wat lehrt, hett för em een besünners groot Bedüden. Meist veertig junge Minschen för dat Rebett „Floristik“un „Zierpflanzenbau“hefft bi Familje Klefer al ehr Lehrtiet harrt. Mit disse Tradition will Dirk wietermaken. „In‘n Ogenblick is bi us allns best topass“, kann Dirk vertellen. Man he weet ok, dat an elkeen Dag Ne‘es up em tokummt. Dor passt een Seggwiesen van Jack Sparrow to: „Nich dat Problem is dat Problem, sünnern up wecke Art un Wies ik up dat Problem togah“.