„Erfolg hett veer Bookstaven: DOON“
René Woltjen: In dat Öller van 24 Johren up egen Been stahn
Vör twee Johrn harr René Woltjen dor den Moot to, mit „Woltjen Garten- und Landschaftsbau“sik up de egen Been to stellen, un dat in dat Öller van just maal 24 Johrn. För em is dat just de rechte Snack: „Wat best up de Reeg to bringen, dat hett veer Bookstaven: Doon!“„Doon“, dat weer al as Kind sien Wiespahl. An‘n Computer sitten oder sik mit de „Playstation“de Tiet dootslaan, dat weer nich sien Ding. Veel lever weer he mit sien Frünnen buten in de Natuur oder he hett in‘n groten Goorn van sien Grootöllern hulpen. Al in jungen Johrn hett he sien Taschengeld mit dat Rasenmeihn oder mit dat Anstrieken van‘n Naber sien Garage grötter maakt. Later nehm he de Gartenfräse van Opa Reinhold in sien Hannen un legg in de Goorns ne‘e Rasen an. Dat he twee rechte Hannen harr, dat kunn he ok mit sinen Roller wiesen. Den hett he so friseert, dat he männigmaal gauer weer as de Polizei dat verlöövt. Mit de School harr he nich veel in‘n Sinn. „Ik bün dor hengahn, wiel mit Frünnen dor ja ok weern“, will René woll togeven. Wat maal sien Beroop weern schull, dat wuss he nipp un nau: Görner, so as Opa. Sien Schoolpraktikum maak he bi
„Garten- und Landschaftsbau Kreye“. Em gefull dat dor best, un so hett he dor ok in de Ferien sien Hannen röögt. Dat versteiht sik, dat ok sien Lehrtiet, as he de Realschool achter sik harr, bi „GaLaBau Kreye“över de Bühn gung. Al in dat tweete Lehrjohr hett he 2014 bi‘n „Landschaftsgärtner Cup“mitmaakt, mit Lehrjungs ut ganz Neddersassen un Bremen. René harr, tohoop mit sinen Partner, enen Platz so in de Midde krägen: „Wi harrn to de Tiet noch veel to minn wat mitkrägen.“Een Johr later stüür Volker Kreye René woller, un nu mit Jannik Körber, to‘n „Landschaftsgärtner Cup“. 23 Teams wullen sik den Titel halen. Grote Freud, as de Gewinner utropen wurrn: De beiden krägen den Siegerpokal in ehre Hannen, un so droffen se to‘n „Bundesentscheid“na Brandenburg/Havel föhrn. Unner de besten van all Landschuppsgörners ut Düütschland kemen René un Jannik up enen goden Platz vörn in de Midde. Un dat weer noch nich allns. Twischen den eersten un den tweeten Wettstriet maak René noch mit een Prüfung sinen Afsluss. Een Johr lang bleev René noch in sinen Bedrief, un denn gung dat för em na‘n „Garten- und Landschaftsbau Ibbeken“in Berne, un hier stund he bi de Arbeit
René Woltjen
ganz vörn. In disse Tiet keem em de Gedanke: „Ik much woll mien egen Firma hebben.“Enen Grundsteen för dissen Weg legg he döör den Besöök van de Meisterschool in Rostrup. In disse Tiet röög he in de fre‘en Minuten sien Hannen as Landschuppsgörner. So keem Geld tohoop för sinen Meisterkurs, un so kunn he sik ok döör sien Doon för de tokamen Tiet bi de Kunnen bekannt maken. Just an de Weekenennen weer faken bit to‘n Düstern Arbeit anseggt, an Partys weer nich to denken. Den Meisterbreef harr he just in sien Tasch krägen, do keem an‘n 17. Juni 2019, een Helpsmann an‘e Siet, de Start in de Garaasch van sinen Opa mit „Woltjen Garten- und Landschaftsbau“. Meist twee Johr sind nu al in‘t Land gahn, un Opa sien Garaasch is al lang veel to lütt. Middewiel höört al teihn Helpslüüd to dat Team van „Woltjen Garten- und Landschaftsbau“. René hett mit sien junge Firma enen Start henkrägen, de kann sik sehn laten. Wat best up de Reeg bringen, dat hett even veer Bookstaven: „DOON“.