Mit Füür dorbi, un de Erfolg is dor
Fred Bunjes: Al in jungen Johrn‘n Rasenmeiher woller to‘n Lopen brocht
De Huusnummer 140 in de Garreler Straat in Littel ward middewiel siet 94 Johrn geern upsöcht. Hier hett Johann Bunjes 1927 sine Smeed mit Hoofbeslag un Wagenboo up de Been stellt. As dat mit de Mechanisierung in de Landwirtschupp in Gang keem, gung dat ok um Verkoop un Reparatur van Landmaschinen. Fred Bunjes hett de Firma nu al in de drütte Generation in sien Hannen, un sien Rebett sünd vandaag Motorgeräte, Rasenmeiher un Kleintraktoren. As he dissen Weg inslaan dee, meen sien egen Familje: „Du büst woll van‘n Padd af!“Bekiekt wi us dat vandaag, so weer elkeen van sien Trää een Erfolg. Anners as de öllere Broor Jann weer Fred Bunjes in jungen Johrn geern för sik alleen. Gung dat um dat Sagen, Bohren un Fielen, weer he in sien Element. „Dat moss brummen un stinken“, vertellt Fred Bunjes mit‘n Smustern. Rein gor nix weer vör em seker. Ok Rasenmeiher, de al lang an‘e Siet stunden, hett he woller to‘n Lopen brocht. Later weer dat denn de egen Mofa, de „friseert“wurd. Un he weer dor jümmer mit bi un kien Meude weer em to veel. „So lang heff ik warkelt, bit de Kraam leep, ok wenn dat up Middernacht togung.“Weern de Kumpels in sien Öller up‘n Footballplatz un harrn hier ehr Vergnögen, weer Fred veel lever in de Warkstää van sien Öllern an‘t Warkeln. Een Handwarker döör un döör! Al in jungen Johrn seet he up‘n Trecker un hulp de Buurn up‘t Feld. Un he kunn dat gor nich verstahn, dat disse Arbeit ok noch Lohn afsmieten dee. „Dat maakt doch eenfach bloots Spaaß!“De School leep so‘n beten nebenbi. In disse Tiet harr he in de Warkstää al veel schruuvt. As he de Realschool achter sik harr, lehr he up „Landmaschinenmechaniker“bi Schröder in Wilshusen. As Gesell gung dat torüch in‘n Bedrief van sien Öllern. Al froh legg Vadder Egon dat Unnernehmen in de Hannen van de beiden Söhns. „Mien Broor Jann harr den Verkoop unner sik un ik de Warkstää“, vertellt Fred. In de Twischentiet maak Fred sinen Meister. De Bedrief wurd grötter un grötter, man de Warkstää bleev lütt. So wurd een grötteret Flach Land an‘n Rand van dat Dörp (Brakland 4) kofft; un hier wurd ene gröttere Hall för‘n Verkoop un ok een gröttere Warkstää boot. Vadder Egon meen to dat, wat sik de Söhns in Kopp sett harrn: „Ji sünd verdreihte Keerls!“Man al 2003, as de ne‘e Boo dor stund, weer he stolt up sine beiden Jungs. Al 1988 harr Fred Bunjes sinen eersten Upsitzmeiher verkofft, un dor weer he mit de Tiet vörut. Harr dat Familjenunnernehmen bit to disse Tiet mehrst mit Landmaschinen to doon, so harr Fred Bunjes nu jüm
Fred Bunjes
mer mehr Füür för den Verkoop un de Reparatur van Motorgeräten un Rasenmeiher. As Vadder Egon dat Huus an de Garreler Straat verkopen wull, weer Fred mit sik sülfst eenig: „Landmaschinen schuuv ik an de Siet, un för mi staht Motorgeräte un Rasenmeiher ganz baben!“Sien Froo Kerstin meen bloots: „Du büst verdreiht!“He övernehm de Immobilie van sinen Vadder, leeet de olen Boo vull un ganz in‘n Dutt gahn un boo an de ole Stää een „Motorgerätezentrum“. As in‘n
April 2014 de ne‘e Boo klor weer, kunn Fred Bunjes wiesen, dat he wiet na vörn keken harr, denn Reedschuppen för‘n egen Gaarn loopt best. Mit Söhn Malte is ok al de veerte Generation in dat Familjenunnernehmen instägen. As de, de dat Leit hett, kann Fred meist gor nich mehr in de Warkstää sien Hannen rögen. Dat geiht bloots noch in de Freetiet. Sien gröttest Hobby sünd VWBullis. Wi köönt woll seggen: Eenmaal Handwarker – jümmer Handwarker!