Stah achter de kloke Lü!
In August-Maand keem de „Welt-Klimabericht“van de UN up ’n Disch. De weer so kant un klaar as dat Amen in de Kark: De Weltclock steiht blots noch up een Minüt vör de Katastoph: Anno Domini 2030 hebben wi wohrschienlik meer as 1,5 Grod Temperatur, wenn wi so wiedermaken as vandag mit Kohle, Öl, Autos, Fleegers, SUVs, Mallorca-Urlaube or mit dösige Krüüzfohrten na Grönland un in de Antarktis. Un wenn disse Kipp-Punkt vorbi is, denn kann keen Minsch, keen Regeern, keen Forscher, keen Dax-Vörstand, keen VW- un BMW-Vörstand noch mit EAutos dat Klima redden. Denn kippt dat – seggen de Wetenskaps-Forscher. Anno Domini 2050 is de Nordpol free van Iis un in de Alpen gifft das keen Gletschers meer. Dat steih sogor vandag al fast.
Un nu kummt mien eegen, persönlik Klimabericht van mien eegen Ümwelt-Geweten: Anno Domini 2051, wohrschienlik in Februar or Mart kummt an de Oostfreeske Küst, in Schillig, Willemshaben un Jadebusen een Monster-Orkan mit so hoch Water, dat keen Seediek meer hollen kann. Denn warrt dat oole Grothertogdom Ollnborg bit an de Dammer Barge henn van de Blanke Hans överrullt. Un Oostfreesland, Butjadingen glieks mit. De NWZ schull nu al man anfangen, een tein Meter hoch Diek ümto dat neej Medienhuus uptobaun.
Dat sünd nu mien düster Gedanken to dit Thema. Een Trost hebb ik obers noch. Un de kummt van uns Ollnborger Welt-Üm-Seiler Boris Herrmann, de up sien Grootseil mit riesige Wöör schreeven harr: „Unite behind the Science“Dat heet denn woll up Platt: „Stah achter de kloke Lü“, aber nicht achter de Trumpisten un Querdenker. Un to de kloke Lü räken ik vandag Greta Thunberg un – vör 200 Johr al – de geniale Naturforscher Alexander von Humboldt (1769-1859). Disse superkloke Minsch hett al wusst un in sien Wark „Kosmos“upwiest, dat de Globus un de Welt blots Bestand hett, wenn all Minschen an de originale Tosommenhang van all Dinge un Gesetze in de Natur - in Lucht, Barge, Water un Eer – denken doot un keen Deel dorvan kött maken willen. Un genau dat seggen vandag ok de kloke Lü van de Weltklimabericht.