De Schöönste Stää för Funke: „Dangast“
Karl-Heinz Funke is woll een van de bekanntesten Lüüd ut‘n Landkreis Freesland. He weer u. a. Minister för Ernährung, Landwirtschupp un Forsten in‘n Bund un in Neddersassen. Un siet männigeen Johr is he ok in‘e Kommunalpolitik aktiv. Wi hefft mit em snackt.
Wat hett de Landkreis Freesland, so dat dor vele Minschen geern leven willt? Funke: Dat Land is flack un even. Du kannst wiet kieken. Wi hebbt Ebbe un Flut un Wind, un so jümmers gode, reine Luft. Fliedige Minschen hoolt use Wirtschaft – de Mittelstand is hier wiet vörn – Dag för Dag in Gang. Elkeen Art van School gifft dat bi us, un
Sport, Kunst un Kultur hebbt ehren Rang. Besünners aver is, dat in Freesland de Minschen nich dicht bi‘nanner huukt. De Upgeregtheiten un Spinnereen van de Ballungsgebieten köönt wi us meist ersporen. Un Sabbelee kann de freeske Minsch nich af.
As Se noch‘n Kind weern, wat weer to de Tiet för Se de schöönste Stää in Ehren Landkreis, un wecke Stää is dat vandaag? Funke: De schöönste Stää weer för mi Dangast (dor bün ik geboren) un de Naverschupp, in de ik upwussen bün. Besünners geern weer ik buten vörn Diek in‘n Andelgroden, mi dat up- un aflopen Water un allns, wat dor kroop un floog, to bekieken. Vandaag is de schöönste Stää bi us up‘n Hoff in Dangast un bi mien Kinner, de ok in Dangast to Huus sünd.
Up wecke Art un Wies hett sik de Landkreis Friesland in de lesden 70 Johr verännert? Funke: Veel hett sik ännert.
■ ut de Dörper sünd veele Bureen, Geschäfte, Handwarker un Schoolen verswunnen;
■ dor is veel boot wurrn, ok um in de 50iger un 60iger Johrn Flüchtlinge un Vertriebene ene ne‘e Heimat to geven un um Egendom för mehr Minschen to schaffen;
■ „Knecht“, „Magd“, de geev dat faken to mien Kinnertiet. Junge Lüüd weet dorvan bloots noch wenig;
■ de Verkehr – denkt wi an de Autos – hett gewaltig tonahmen. In de 50iger Johrn kunnen wi noch up jede Straat boßeln;
■ veele Minschen maakt bi us Urlaub. De Tourismus is enen groten Deel van us Wirtschft wurrn;
■ de Freeheit, mit de wi as Jungs un Deerns in dat Dörp upwussen sünd, gifft dat so nich mehr.
Dor gifft dat veele Gründe to, un dat is to beduurn. Ik kunn dor noch veel mehr to seggen, dat is een Thema för enen ganzen Abend un mehr.
Harrn Se enen Wunsch free, wat wullen Se in Freesland anners maken?
Funke: Städte un Gemeenden mehr Möglichkeiten geven, dat se Booland hefft för junge Familjen un för Gewerbegebiete; dat schull de Kreispolitik in Gang bringen. Un dat gellt nich bloots för Freesland! Minen tweeten Wunsch, mehr Gedüür mit- un mehr Freeheit för Kinner, Jungs un Deerns.
Wat bedüd för Se Heimat? Funke: Wo mi allens vertroot is, de Minschen, de Natur un Landschupp, Weg un Steeg.