Jeversch Kiewittei
De rieke Koopmann Meier ut Jever, de dor an de Eck van de Steenstraat wahnen deit, hett vanabend Besöök, Mennens sünd dor. Generalkonsul Mennen sülvst is ja‘n ganz ümgänglichen Minschen, ganz eenfach weg, nix Besünners. Aber wat sien Froo is, de meent sik wunners wat, wat se vörstellen deit. De bildt sik dull wat in, ut wat för een vörnehm Familje se herkummt.
Na‘n Tietlang kummt Meier sien Dochter mit hörn Brögam.
„Goden Abend, Froo Mennen! Goden Abend, Herr Konsul!“
„Pah!“, seggt dor Froo Mennen, „Konsul!? Napoleon, de weer Konsul! Aber mien Mann is Generalkonsul! Hebbt Se verstahn?“
Gustav Ehlers, 1906 – 1986, weer Schoolmester in Sillenstede. He hett woll so bi 200 Döntjes ut dat Jeverland to Papeer brocht. Dat he disse lütt Vertellen „Kiewitteier“nöömt hett, versteiht sik. Weern dat doch de „Getreuen“ut Jever, de in elkeen Johr Otto von Bismarck to sinen Geburtsdag an eersten in‘n Aprilmaand 101 Kiewitteier tostüürt hefft.