Huusopgaven sünd wichtig un bruukt Tied

Woll jedeen van us kunn us wat över de School vertelln, wat vandag us Thema is. 1919 wurr fastleggt, dat all Kinner tohoop to School gahn mööt. Von dor af an bit vandag is veel anners wurrn. Wenn ik an mien Schooltied denk, is mi, as wenn ik ut een anner Tied kaam. Use School keem mit twee Schoolmesters un twee grode Klassenrüüm ut. Een för dat eerste bit veerte Schooljahr un een för dat fievte bit neegte Schooljahr. Ik weer mit een van de Letzten, de to de Oostertied in School keemen. Dat geev noch een Schooltafel, een Griffel un een Lappen to’n Afwischen. Ik weet noch, dat wi schön schrieven mussen, dat geev Noten för de Schrift. Allens muss ornig wesen. Un wehe, dor weer mal een Eselsohr an een Book to sehn. Us wurr fröher nich allens vertellt, dat geev Saken, de weern nich för Kinnerohren bestimmt. As ik denn later op een anner School keem, weer dat een Unnerscheed as Dag un Nacht. Een groden Room för een Schoolklass un för jedeen Fack een anner Schoolmester. – Lang is her, vörbi de Tieden, wo na evangelsch un katholsch trennt wurr. Un wo bloots Jungs wat lehrn mussen, bi Deerns keem dat nich dorop an, de heirad sowieso. So as de Tieden sik ännert, ännert sik ok de School un dat wat lehrt warrt. Un dat gifft seker veel to vertelln över de Tied in School, Dummtüüch, Fründschop un veelns mehr. Un nu wünsch ik Jo veel Pläseer bi’t Läsen

Joe (Ollnborger Platt)

Op us Buurnhoff geev dat jümmers wat för us Kinner to doon. Wenn wi mit us Husopgaven kloor weern, weer an Speelen oder annerswat eerst mal nich to denken. Mien Broer weer fix mit de Opgaven dör. Man ik heff extra bummelt un alltied langen brukt. Wi harrn man minn

Platz un seeten tohop an een Disch. Ik tövde bit he ferdig weer un ik för mi alleen. Wenn he dat sehn harr, dat ik wat anners maak as Husopgaven, harr he dat nich för sik beholln. Ik verdeelte allens so op ‘n Disch, dat dat so utsehg, as wenn ik goot wat to doon harr un denn keem eerstmal dat neeste Book ut de Bökeree ut de Schooltasch. Bloots een paar Sieden läsen. De Husopgaven

lepen jo nich weg. Un denn heff ik läst un läst un kunn so gau gor nich dormit ophörn. Weer ok veel intressanter. Mit een Ohr heff ik lüstert, of well kummt. Towielen heff ik jüst noch op lesde Minuut dat Book gau in de Schooltasch stoppt kregen un dat Engelschbook, dat ik al paraat leggt harr för Vokabeln lehrn, to Hand nahmen. Oder eenfach in een Heft wat wieterschreven, wo ik vörher in anfungen weer. „Lernst du jümmers noch? Denn kumm man eerstmal un drink een Tass Tee. Denn geiht dat ok beter“, keem Mudder denn to Teetied, so bi Klock dree. Dorna gung dat wieter, ik heff denn de Opgaven ferdig maakt un wieter läst. So is all de Jahren nüms dorachter kaamen. Husopgaven sünd even wichtig un brukt ehr Tied.

Wilko Lücht.

Bbi „Snacken un Verstahn“bün ik de Neje. Wenn ’t na mi gung, muss ’t egenlik „Proten un Verstahn“heten, denn ik bün Oostfrees un wohn eerst siet verleden Jahr in Ollenbörg. Butendeem bün ik noch negenundartig Jahr old, een Meter fievunsöventig groot un van Beroop Bibliothekaar. In mien Freeitied lees un schriev ik geern, fahr Fahrrad un spööl Örgel.