Rheinische Post Duesseldorf Meerbusch
Locke em Lockdown
Wenn minne Broder domols en de Hippie-Ziet met sin lange Hoor eraankohm, hät de Omma selech trek ehre Sennef dobejejäwe: Däm Jong es dä Frisör jestorwe! Och hütt süht mr drusse vill Lütt met ähnleche Frisürkes erömloope. Denne ehre Figaro hät nit dr Deckel op de Nas jekritt, dä hät e Schild aan de Salongdör hänge mösse: Jeschlosse wäje Corona! Wat nu? Wat ons Frollütt aanjeht, make mer ons deswäje nit doll. Dat janze Fijaro-Sortimäng ussem Drojeriemaat hammer schonn lang em Speejelschrank vom Badezemmer för Notsittewazzjohne. Us de lamäng kömmer ons em Home-Styling dank Spray on Gel ene Volume-Lockekopp föne on de Färw flöck wechsele, dojäje es e Chamäleon janix. Bloß för dat Friemele för ene Fassongschnitt - och am Hengerkopp - brucht mr e besske Fengerspetzejeföhl. Äwer dat es jo ons Fraue sowieso wie aanjebore. Wie süht et nu met so’nem staatse Kähl sinne Kopp us? Hät hä sowieso en Pläät, es dat Problem vom Desch. Well dä Jong op kinne Fall ene Laie aan sinnem Lockekopp erömkrose losse, moss hä sech äwe sin Hoorpracht als Pähdsstähz a la Larerfeld henge zosammebenge. So’ne Zopp kann us enem alde Bühdel trek ene jonge Sprenghöppes make. Jlatte dönne Flüskes lang erongerhänge losse? Nä, dat es e afsolut No-go. Wä well schonn wie ene Neandertaler erömhöppe! Dann leewer e Frisürke met Macke vom Fräuke handmade em Homeoffice! Sollt so’ne Schnitt donäwerjonn, mäkt dat nix: Enem Charackterkopp kann nix entstelle! Monika Voss