Rheinische Post – Düsseldorf Stadt
Lütt em Bade-look
Nä, wat esset herrlech, wenn mr en de Sommermerferije op Jöck jeht! Fott von zo Huus, am leewsde am Meer met Welle, Wengk on Sonnesching. För so'ne Strandurlaub es dat rechtije Bade-outfitt dat „must-have“! Wie säht dä Engländer so schön? Less is more! Dat heeßt op Platt: Janix es och jet odder janz wennech es vill! Ech well jetz ussem Niehkörwske (bzw. ussem Strandkorw) verzälle, wat ech mech am Meer för Fijure hann aankicke könne. Modelle wie us enem Hollywoodfilm entspronge, donn ech blass vör Neid nit beschriewe! Äwer nu kütt dat jenaue Jäjedeel! Moss mr sech, wenn us de Wespetallje von anno dunnemols enzwesche en
Hummeltallje jewohde es met leckere Speckröllekes rongkeröm noch en dä Minibikini zwänge, en dat Tangabüxke mem
Kördelche henge on enem klitzekleene Dreieck vöre? Nu moss ech noch de Mannslütt dörch de Zäng trecke. Süht dä Jong us wie `ne Adonis, mäkt hä en jedem Look en bella fijura. Äwer Type, die noh däm Motto läwe - Enem staatse Kähl kann nix entstelle -schmieße sech jähn en de spacke Badebux,, wo dä Bierbuck jemötlech am dröwerschwappe es! Dobei jöwt et doch Schwemmshorts en XXL met exotesch-knallbonte Papajeiemuster drop, wat janz doll aflenkt, wenn de Fijur ussem Leim jejange es. Keener hät sech selws jemaht! Äwer jeder hät doch ene Speejel zo Huus, en däm mr sech von alle Sidde, vöre on henge, janz jenau bekicke sollt, bevör mr sech däm Strandpublikom präsenteert odder?