Papeer es jedoldech

Et jeht doch nix öwer so’n schöne Erennerong, besönders wenn et sech öm Ferijefottos handelt! Nä, wat hammer bloß för ene Hoope von herrleche Fottos en de Ferije jeschosse! Jetz mösse mer noch dat Besde drus make, domet jeder kicke kann, wie doll dä Urlaub jewäse es on wat för ene bejnadete Fottejraf met de Nas, bzw. met de Öjelches dobei jewäse es. Hüttzedaach hät mr jo en Dijitalkamera on e Projramm em PC, met däm mr prima aan de Fottos erömfriemele kann, wenn mr widder zo Huus hockt.

Dat heeß, dat mr –häste-nit-jesenn – us en hässleche Ent ene Paradiesvorel make kann. För zom Beispeel wöhd dä sonneblomejähle Bikini vom Finche-Fiona met enem flöcke Click lilla. On wie süht denn op däm Fotto ons Papp us? Wiss wie ene Mozarella! Wor doch jelacht, wemmer däm nit en lecker braune Kakaufärw aanbrassele künnt! Och, wat es dat denn? Kick ens aan! De Mamm es op däm eene Fotto janit drop, äwer doför op enem angere bloß von henge. Rubbeldikatz setze mr se och met en dä Strandkorw, domet de janze Famillichbajahsch komplett es.

Och enä, ons Rotzech Leo-Linus hät janit sin Sangkschöpp dobei, dat Jebohtsdaachsjeschenk von de Omma! Nä, dat es sozesare e „nogo“! Zack, wöhd dat Dengen däm Ströppke och noch en de Hangk jedeut! Nu hammer e prima Fotto för de Omma ehre Jebohtsdaach! Beinoh hädde mer de Omma och noch op dat Fotto jekritt, äwer dä Fusch wör trek opjefalle, denn se es doch janit metjefahre.