Pengsde brengt Jrillwähder
Nu hammer widder e lang Wocheäng op de Matt stonn. Wenn mr denne Wähderfrösch jlöwe darf, kömmer ons rongkeröm op Sonnesching freue. Mr fängt aan hen on her zo simoleere: Wat sommer donn? Jommer op Jöck odder bliewe mer zohuus? Bei däm Wähder esset drusse öwerall rabbelvoll! Dann hät mr bloß fies Maläste mem Afstandhalde. Nä, mer amüseere ons leewer em Jahde on schmieße dä neue Jrill aan! Siet letzde Woch darf mr jo och widder met 10 Lütt am Desch setze bzw. öm dä Jrill erömstonn.
Es dech schonn emol opjefalle, dat emmer bloß de Jonges am Jrill stonnt? Dat litt denne en de Jene, kütt us de Steenziet. Domols send bloß de Mannsbelder op de Jachd jejange, hannt dat nödije Fleesch eraanjeschleppt on woren dann fachmännesch mem Füer am hanteere. De Frollütt woren braw de Höhle am usfäje on propper make. Noh däm Motto vom Schillers Freddy „ Fraue am Kochpott em Huus on Mannsbelder ennet feindleche Läwe erus.“
Bes hütt es ons Emanzipazzjohn noh nit am Jrillrost aanjekomme. Frollütt halde sech emmer noch jähn wiet fott vom Füer op, röhre jrad emol en de Schlootkomp eröm, zuppe Basilikumblättches odder kippe sech schonn emol e Piccolöche. Natörlech dörfe se däm Maestro am Jrill och möngkesmoß en Bierfläsch en de Hangk deue.
Weeßde, wat Brassele an de Jrill för ene Doosch mäkt? Ene dröje Wing wöhd et zur Not och donn, äwer dä Jähschtesaff es doch urijer. Wat dat elejante Jrill-Outfitt aanjeht, hät sech dä staatse Kähl natörlech en Kawenzmannsschöhz ömjebonge on es ene Hangkschoh am drare Modell Neuers Manuel. So’ne Luxus hadden de Kähls en de Steenziet noch nit, äwer doför hadden die och e janz dick Fell!
Monika Voss