April fängt ieskalt aan
Nä, wat hammer am Äng vom Mähz för e lecker wärm Wähder jehatt! Em schönnsde Sonnesching hammer op de Terasse setze könne, on janz Fröhflöcke hannt direktemang Wööschkes on Kottletts op dä Jahdejrill jeschmesse. Jlöckleche Cabrio-Fahrer send „owe ohne“met Wengk en de Hoor erömjefletzt on hannt sech dä eeschde Sonnebrand op de Pläät jehollt. Fröhjohrsklamotte wohde aanjetrocke, on rongkeröm hät mr sech op Sonnesching enjestellt.
Von wäje! Dä Droom wor flöck usjedröömt. Koom stung dä April op de Matt kunnt mr sech Fröhleng on Sonnesching afschmenke. Jeföhlt semmer jetz widder medde em Wenter. Fies usselech met Temperature zom Bibbere! Räjedroppe komme hee on do als Schneeflocke eraf, on ons Wähderfrösch, de meteoroloresche Schlauköpp hannt sojah nachts Jlatties aanjesaht.
Ussem Kleederkaste kannsde nu wärme Söck, Wollmötz on Kaschmirschal widder eruskrose on doför dat dönne Jäckske widder janz noh henge hänge. Stattdesse dehsde dech en dä mollije Annorack met de Pelzkapuz schmieße. Och drusse em Jahde moss mr sech op dä Wähderömschwong enstelle. Dä Oleander em Terracottapott op de Terrass – vill zo fröh us de Jarahsch noch drusse jestellt – kritt jetz vörsechtshalwer ene Palletoh us Plastickfolie ömjehängt, söns kann dä ärme Boom sin Blöteziet jetz schonn verjesse.
Min Primelkes em Jahde losse siet letzde Nacht bedröppelt de Köpp hänge. Dä April hät se kalt erwischt! Äwer mech öwrejens och! Een Woch em Fröhlengsoutfitt on met näcke Fööß en de Sneakers erömjehöppt on siet jester Kribbele en de Nas on Kratze em Hals! Nä, dat es nit Corona, dat es ene janz ordinäre Pips! Mäkt nix, jeht flöck vörbei, jenauso wie dat kalde Wähder. April mäkt watte well on hät jaranteert och noch Sonnesching em Jepäck!