Jedöns öm dä Azvänzkranz
Morje fängt de Azvänzziet aan. Selws de jrößde Schlofmötz moss dat nu spetz jekritt hann, och wenn se noch nit op dä Kaländer jekickt hät. Schonn en de letzde Woch kunnt mr aan keene Blomelade vörbeijonn, ohne drenne on drusse vör de Dör öwer de Azvänzkränz zo falle, on dat en alle Variazzjohne. Jroße on Kleene, dezent on cool-schlicht odder opjebrasselt met en dicke Stronz-Schlöpp drömeröm on kitschije bonte Kurele draan odder dat klassesche Modell us jrönem Tannejröns mem rode Kähzekwartett on fähdech!
Alle Johr widder hole sech Lütt, die op Tradizzjohne halde, jetz ene Azvänzkranz ennet Huus. Dat Dengen es sozesare e „must-häve“, wie dat hütt so schön heeß. Nä, ohne Kranz jeng janit, dat wör doch jlatt e „no-go“! Bei de Famillich Schmitz-Kittelbach jeht hüttmorje am Fröhstöcksdesch noch de Diskussjohn loss, wat för ene Kranz et dies Johr för de Azvänzziet sin soll. Wie mer hee all wesse, es jede Jeck angers on en so’n Famillich sowieso. Omma on Oppa stonnt janz op Nostaljie on wolle wie emmer dä Kranz en Jrön on Rod. De Mamm möhd sech emol ene moderne Deu aandonn on steht dies Johr op Lila on Selwer. Domet hängt se däm Papp solang en de Ohre, bes ehm de Dekorazzjohn drissejal es, bloß dat Tannejröns moss escht sin. De Pänz, et Fiona-Marie on dä Linus-Döres schwemme em Momäng op de WM-Well on wönsche sech am Kranz jüldene Troddele us Sammet on Sied wie beem Sultan en Katar. Jetz bliewt bloß noch de Froch: Kütt dä Kranz widder en de Medde vom Wohnzemmerdesch odder soll dä dies Johr emol owe aan de Deck hänge? Dann mösst mr sech äwer de eschte Kähze afschmenke. Denn wä well schonn heeß Wachs op’m Kopp dröppele hann! Kooz on joot kütt dä Azvänzkranz wie alle Johr widder op dä Wohnzemmerdesch bei Schmitz-Kittelbachs. Äwer wie dat Schmockstöck am Sonndaach ussüht, on wie et dekoreert es, dat steht hütt noch en de Stähne.
P.S. Wie es dat denn bei üch zohuus? Hadder als ene Azvänzkranz jekooft odder sidder noch am öwerläje, dat Dengen janz jenial als Unikat on Rarität dies Johr selwer zo friemele?